నితిన్.. నోరిప్పవేంటి నాయనా?

హ్యాట్రిక్ హిట్ల తర్వాత ‘చిన్నదాన నీకోసం’ తేడా కొట్టేయడంతో తన తర్వాతి సినిమాను ఓకే చేయడానికి చాలా టైం తీసుకున్నాడు నితిన్. ఏడెనిమిది నెలల విరామం తర్వాత చివరికి ‘అఆ’ సినిమాకు కమిటయ్యాడు. అతను తీసుకున్న విరామానికి మంచి ఫలితమే దక్కింది. ‘అఆ’ నితిన్ కెరీర్లోనే బిగ్గెస్ట్ హిట్టయింది.

ఫామ్ లోకి వచ్చేశాడు కాబట్టి ఇక వరుసగా సినిమాలు చేసేస్తాడేమో అనుకుంటే నితిన్ మళ్లీ పాత బాటలోనే నడుస్తున్నాడు. తన ముందుకు చాలా ప్రపోజల్స్ ఉన్నా కూడా దేన్నీ తేల్చక నాన్చుతున్నాడు. ‘గుండెజారి గల్లంతయ్యిందే’ ఫేమ్ విజయ్ కుమార్ కొండా దర్శకత్వంలో సినిమా చేయడానికి ఎప్పుడో అంగీకారం కుదిరింది కానీ.. సెకండాఫ్ సరిగా రాకపోవడంతో ఆ ప్రాజెక్టు విషయంలో తుది నిర్ణయం తీసుకోలేదని ‘అఆ’ ప్రమోషన్ల సందర్భంగా చెప్పాడు నితిన్. మరోవైపు సంపత్ నంది నితిన్ కు ఓ కథ చెప్పాడు కానీ.. అతను ఇంప్రెస్ కాలేదు.

మరోవైపు ‘రౌడీ ఫెలో’తో దర్శకుడిగా మారిన కృష్ణచైతన్య కూడా చాలా కాలంగా నితిన్ కోసం వెయిటింగ్ లో ఉన్నాడు. మల్లిడి వేణు అనే కుర్రాడు కూడా నితిన్ కోసం వెయిట్ చేసి చేసి..చివరికి అల్లు శిరీష్ తో సినిమా చేయడానికి సిద్ధమైపోయాడు. మరోవైపు ‘నేను శైలజ’ ఫేమ్ కిషోర్ తిరుమల కూడా నితిన్ కోసం వెయిటింగులో ఉన్నాడు. ఐతే ఎవరికీ గ్రీన్ సిగ్నల్ ఇవ్వకుండా నాన్చుతూనే ఉన్నాడు నితిన్. ఇంతకీ చివరగా ఈ యువ కథానాయకుడు ఎవరికి ఓటేస్తాడో చూడాలి.