నితిన్ తర్వాత రాసే అక్షరాలేంటో?

నితిన్ తన కెరీర్ లోనే బిగ్గెస్ట్ హిట్ సాధించిన హుషారులో ఉన్నాడు. త్రివిక్రమ్ తీసిన అ..ఆ.. మూవీలో నటించిన నితిన్.. ప్రస్తుతం మిలాన్-ఇటలీలో హాలిడే టూర్ వేస్తున్నాడు. ఆ సినిమా వచ్చి 50 రోజులు దాటిపోతున్నా ఇంకా నెక్ట్స్ ప్రాజెక్ట్ విషయంలో ఈ కుర్ర హీరోకి క్లారిటీ రావడం లేదు. పైగా తనకు గుండెజారి గల్లంతయ్యిందే లాంటి హిట్ ఇచ్చిన విజయ్ కుమార్ కొండాకు నో చెప్పాడని తెలుస్తోంది.

సక్సెస్ ఇచ్చిన డైరెక్టర్ ని కాదనేందుకు నితిన్ దగ్గర ఓ రీజన్ ఉంది. ఇప్పుడు తన కెరీర్ లోనే తొలిసారిగా 50 కోట్ల వసూళ్లు సాధించిన సినిమా చేశాడు నితిన్. తన తర్వాతి ప్రాజెక్టు కూడా ఈ రేంజ్ లోనే ఉండాలన్నది ఈ హీరో ఆలోచన. మరి ఆ స్థాయి సినిమా అంటే.. చిన్నాచితకా డైరెక్టర్లు.. మీడియం రేంజ్ మూవీస్ తీసే డైరెక్టర్లతో సాధ్యం కాదు. మళ్లీ టాప్ డైరెక్టర్ తో చేస్తే మాత్రమే.. తర్వాత సినిమా కూడా ఈ స్థాయికి తీసుకెళ్లే ఛాన్స్ ఉంటుందని.. నిర్మాణంలో అనుభవం ఉన్న నితిన్ కి బాగానే తెలుసు.

అందుకే పెద్ద డైరెక్టర్ తోనే సినిమా చేయాలని పంతం పట్టుకు కూచున్నాడు నితిన్. మరోవైవు త్రివిక్రమ్.. కొరటాల.. రాజమౌళి.. పూరి జగన్నాథ్.. సుకుమార్.. శ్రీను వైట్ల.. వినాయక్.. ఇలా అందరూ ఫుల్లు బిజీగా ఉన్నారు. మరిప్పుడు నితిన్ ఏం చేస్తాడో! ఎవరితో తీస్తాడో! అ..ఆ.. తర్వాతి రెండక్షరాలు ఎవరితో రాయించుంటాడో!