నితిన్ కు ఆ అంశం కలిసొస్తుందా..?

2020 కరోనా లాక్ డౌన్ కు ముందు వచ్చిన 'భీష్మ' సినిమాతో సూపర్ హిట్ అందుకున్నాడు యూత్ స్టార్ నితిన్. అయితే లాక్ డౌన్ తర్వాత వచ్చిన 'చెక్' సినిమా నటుడిగా నితిన్ కు మంచి పేరు తెచ్చిపెట్టినా కమర్షియల్ సక్సెస్ అనుకోలేకపోయింది. ఈ క్రమంలో తనకు భారీ విజయాన్ని అందించిన సితార ఎంటర్టైన్మెంట్స్ బ్యానర్ లో ''రంగ్ దే'' అనే ఫ్యామిలీ ఎంటర్టైనర్ తో వస్తున్నాడు. వెంకీ అట్లూరి దర్శకత్వం వహించిన ఈ చిత్రంలో 'మహానటి' కీర్తి సురేష్ హీరోయిన్ గా నటించింది. ఈ నెల 26న ప్రేక్షకుల ముందుకు రానున్న నేపథ్యంలో ప్రమోషనల్ కార్యక్రమాలతో మేకర్స్ బిజీగా ఉన్నారు.

ఇప్పటికే కర్నూల్ లో ట్రైలర్ లాంచ్.. హైదరాబాద్ లో ప్రీ రిలీజ్ ఈవెంట్ నిర్వహించారు. ఇక మార్చి 24న రాజమండ్రిలో గ్రాండ్ రిలీజ్ ఈవెంట్ ప్లాన్ చేశారు. ఇలా కోస్తాంధ్ర రాయలసీమ తెలంగాణ ప్రాంతాలను కవర్ చేస్తూ 'రంగ్ దే' ని బాగా ప్రమోషన్స్ చేస్తున్నారు. అలానే రాక్ స్టార్ దేవిశ్రీప్రసాద్ కంపోజ్ చేసిన సంగీతం శ్రోతలను కట్టుకుంది. అలానే ట్రైలర్ తో సమ్మర్ లో ఫ్యామిలీ ఆడియన్స్ చూసేలా కామెడీ ఎమోషన్స్ కలబోసిన సినిమా అనిపిస్తోంది. ఈ నేపథ్యంలో తెలుగు రాష్ట్రాల్లో 'రంగ్ దే' 36కోట్ల వరకు బిజినెస్ చేయగా.. ఓవర్సీస్ లో కూడా మంచి రేటు పలికినట్లు తెలుస్తోంది. మరి 'భీష్మ' వంటి హిట్ సినిమా తర్వాత అదే బ్యానర్ లో వస్తున్న నితిన్ కు ఎలాంటి ఫలితం దక్కుతుంతో చూడాలి.