తప్పుగా అర్థం చేసుకోవద్దంటున్న నితిన్

పవర్ స్టార్ పవన్ కళ్యాణ్ కు నితిన్ ఎంత పెద్ద ఫ్యానో కొత్తగా చెప్పాల్సిన పని లేదు. పవన్ కోసం ఏం చేయడానికైనా సిద్ధమన్నట్లుగా కనిపిస్తాడు నితిన్. ఈ నేపథ్యంలో పవన్ కళ్యాణ్ పూర్తి స్థాయి రాజకీయాల్లోకి దిగిన నేపథ్యంలో రాబోయే ఎన్నికల్లో సినీ పరిశ్రమ నుంచి అతడితో కలిసి నడిచేదెవరన్న చర్చ వచ్చినపుడు నితిన్ పేరు వినిపించింది.తెలంగాణ ప్రాంతంలో పోటీకి దిగే పరిస్థితుల్లో నితిన్ సాయం తీసుకోవచ్చన్న అభిప్రాయాలు కలిగాయి. ఇటీవల తన కొత్త సినిమా ‘చల్ మోహన్ రంగ’ ప్రమోషన్లలో భాగంగా పవన్ పిలిస్తే పార్టీ కోసం తన వంతు సాయం చేయడానికి సిద్ధమని నితిన్ ప్రకటించాడు.దీంతో అతను రాజకీయాల్లోకి వచ్చేస్తున్నాడనే ప్రచారం జరిగింది.

దీనిపై నితిన్ క్లారిటీ ఇచ్చాడు. పవన్ పిలిస్తే ఏ సాయమైనా చేయడానికి తాను సిద్ధమని ప్రకటించాను తప్ప రాజకీయాల్లోకి వస్తానని తాను అనలేదని అతను స్పష్టం చేశాడు.అయినా పవన్ కళ్యాణ్ కు తన సాయం తీసుకోవాల్సిన అవసరం ఉండదని అతను అభిప్రాయపడ్డాడు. ఐతే తన ఆరాధ్య కథానాయకుడి కోసం తాను ఏం చేయడానికైనా సిద్ధమని అతను మరోసారి ప్రకటించాడు. ‘చల్ మోహన్ రంగ’ సినిమాను నితిన్ తండ్రి సుధాకర్ రెడ్డితో కలిసి పవన్ కళ్యాణే స్వయంగా నిర్మించిన సంగతి తెలిసిందే. ఈ చిత్రం ప్రస్తుతం మంచి వసూళ్లతో సాగుతోంది. వీకెండ్లో చాలా వరకు పెట్టుబడి వెనక్కి రావడంతో బయ్యర్లు హ్యాపీగానే కనిపిస్తున్నారు. ‘రంగస్థలం’ లాంటి ఇండస్ట్రీ హిట్ను తట్టుకుని ఈ చిత్రం బాగానే నిలబడింది.