శ్రీనివాస కళ్యాణం సందడి లేదే!

శతమానం భవతితో జాతీయ అవార్డు దక్కించుకునే సినిమా అందించిన దర్శకుడు సతీష్ వేగ్నేశ రూపొందిస్తున్న శ్రీనివాస కళ్యాణం సందడి ఎందుకో బాగా చల్లారిపోయింది. నితిన్ హీరోగా రాశి ఖన్నా హీరోయిన్ గా రూపొందుతున్న ఈ మూవీ షూటింగ్ ప్రస్తుతం గోదావరి జిల్లాలతో పాటు అమలాపురం పరిసరాల్లో జరుపుకుంటోంది. కానీ రెగ్యులర్ గా అప్ డేట్స్ ఇవ్వకపోవడంతో అసలు ఏం జరుగుతోందా అనే అనుమానం కలగడం సహజం. ఆ మధ్య సతీష్ అవుట్ ఫుట్ మీద నిర్మాత దిల్ రాజు అంత సంతృప్తిగా లేకపోవడంతో కొంత రీ షూట్ జరిగిందన్న వార్తలు కూడా వచ్చాయి. అవి నిజమో కాదో కానీ ముందు అనుకున్న ప్లానింగ్ ప్రకారం అయితే షూటింగ్ ఈ పాటికే పూర్తి కావాల్సి ఉంది. షూటింగ్ ప్రారంభ సమయంలో జులై లో విడుదల ఉంటుంది అని ప్రకటించారు కూడా. కానీ ఆ ఛాన్స్ లేదని స్పష్టంగా కనిపిస్తోంది. ప్లానింగ్ లో పక్కాగా ఉండే దిల్ రాజు బ్యానర్ లో మీడియం బడ్జెట్ మూవీకి ఇలా జరగడం ఆశ్చర్యం కలిగించే విషయమే.

వరస చూస్తుంటే ఆగస్ట్ లోనే వచ్చేలా ఉంది శ్రీనివాస కళ్యాణం. ఫామిలీ ఎమోషన్స్ ని బాగా చూపించే సతీష్ వేగ్నేష్ ఇందులో కూడా అదే పంధాలో తెలుగు కుటుంబాల్లోని వివాహ వేడుకలను బ్యాక్ డ్రాప్ లో తీసుకున్నట్టు కనిపిస్తోంది. అప్పట్లో చిన్న టీజర్ ని మోషన్ పోస్టర్ రూపంలో వదిలిన తర్వాత కనీసం ఫస్ట్ లుక్ కూడా విడుదల చేయలేదు. మరి కనీసం ఆగస్ట్ లో అయినా ఉంటుందా లేక ఇంకా ముందుకు తోస్తారా అనేది వేచి చూడాలి. సతీష్ వేగ్నేశ ఇది నిర్మాణంలో ఉండగానే తన నెక్స్ట్ మూవీ ఏర్పాట్లలో కూడా ఉన్నారు. డాక్టర్ కెఎల్ నారాయణ నిర్మాతగా ఒక స్టార్ హీరోతో సినిమా రూపొందించే ప్లానింగ్ లో ఉన్నట్టు గత వారమే వార్తలు వచ్చాయి. అది అధికారికంగా నిర్ధారించలేదు కానీ ఆల్మోస్ట్ ఓకే అయినట్టు సమాచారం. ఇదిలా ఉంచితే శ్రీనివాస కళ్యాణం సందడి లేక నితిన్ ఫాన్స్ మాత్రం ఎప్పుడా అని ఎదురు చూస్తున్నారు. మరి సతీష్ కానీ దిల్ రాజు కానీ ఎవరో ఒకరు అప్ డేట్ ఇస్తే బెటర్.