మా ఆవిడ‌ త‌ర్వాత త్రివిక్ర‌మ్ నా రెండో ప్రేమ‌

``షాలిని (భార్య‌) తరువాత త్రివిక్రమ్ నా రెండో ప్రేమ. పవన్ కళ్యాణ్ .. త్రివిక్రమ్ ప‌రిశ్ర‌మ‌లో నా రెండు క‌ళ్లు`` అని అన్నారు యూత్ స్టార్ నితిన్. నితిన్ - కీర్తి సురేష్ జంట‌గా నటించిన రంగ్ దే ఈనెల 26న థియేట‌ర్ల‌లోకి విడుద‌ల‌వుతోంది. ప్రీ-రిలీజ్ వేడుక‌లో నితిన్ మాట్లాడుతూ పైవిధంగా స్పందించారు.

అఆ తో త‌న‌కు బ్లాక్ బ‌స్ట‌ర్ ని ఇచ్చిన త్రివిక్ర‌మ్ పై త‌న వ్యామోహాన్ని ప్రేమ‌ను ఎంత‌మాత్రం దాచుకోలేక‌పోయారు నితిన్. గురూజీ ముఖ్య అతిథిగా రావ‌డ‌మే ప్ర‌త్యేక వైబ్స్ తెచ్చిందంటూ నితిన్ ఆనందం వ్య‌క్తం చేశారు. ``సినిమాటోగ్రాఫ‌ర్ పీసీ శ్రీరామ్ ‌తో కలిసి రెండు చిత్రాలకు పనిచేయడం నా అదృష్టం. నేను ఈ చిత్రంలో 24 సంవత్సరాల యువ‌కుడిగా క‌నిపిస్తాను. ఇందులో కీర్తి కంటే నేను చాలా చిన్నవాడిని. కీర్తి ఒక మ‌హాన‌టి.. అది ఎప్పటికీ మరచిపోలేం. ఈ చిత్రంలో ఆమె మహా నాటు .. ఘాటు. ప్రేమ కథలను రూపొందించడంలో వెంకీకి మంచి సునిశిత విజ్ఞానం సున్నితత్వం ఉన్నాయి`` అని అన్నారు.

నిర్మాతలతో నాకు ఇది మూడవ చిత్రం. అఆ..భీష్మ‌కు ముందు అపజయాలు ఉన్నాయి. ఆ రెండు చిత్రాలు నాకు మంచి బ్రేక్ ఇచ్చాయి. ఇప్పుడు హిట్టు సెంటిమెంట్ రంగ్ దేతో పునరావృతమవుతుందని నేను ఆశిస్తున్నాను... అని నితిన్ ఎమోష‌న్ కి గుర‌య్యారు. నితిన్ నాకు సొంత బ్ర‌ద‌ర్ అని త్రివిక్ర‌మ్ వేదిక‌పై ఆప్యాయ‌త‌ను క‌న‌బ‌రిచారు.