క్లిక్ క్లిక్: వైఫ్ తో యూత్ స్టార్ వెడ్డింగ్ యానివర్సరీ సెలబ్రేషన్స్..!

యూత్ స్టార్ నితిన్ లాక్ డౌన్ సమయంలో తన బ్యాచిలర్ లైఫ్ కి గుడ్ బై చెప్పి వివాహ బంధంలో అడుగుపెట్టిన సంగతి తెలిసిందే. తాను ప్రేమించిన చిన్ననాటి స్నేహితురాలు షాలిని కందుకూరి ని 2020, జూలై 26న పెళ్లి చేసుకున్నారు నితిన్.

నిన్న మంగళవారానికి వీరి వివాహం జరిగి రెండేళ్లు పూర్తయ్యింది. ఈ నేపథ్యంలో నితిన్ తన భార్యతో కలిసి రెండో వార్షికోత్సవం జరుపుకుంటున్నట్లు సోషల్ మీడియా వేదికగా వెల్లడించారు. తన అర్థాంగికి పెళ్లిరోజు శుభాకాంక్షలు తెలిపాడు.

''నా ప్రేమ .. మాకు హ్యాపీ వెడ్డింగ్ యానివర్సరీ'' అని పోస్ట్ పెట్టిన నితిన్.. తన సతీమణితో దిగిన ఓ లవ్లీ పిక్ ని కూడా షేర్ చేసాడు. ఇందులో నితిన్ కోరమీసంతో సరికొత్త లుక్ లో కనిపిస్తుండగా.. షాలిని నవ్వుతూ సెల్ఫీ తీసుకుంది. నితిన్ తదుపరి సినిమాలో ఇదే లుక్ తో కనిపిస్తాడని అభిమానులు భావిస్తున్నారు.

మరోవైపు శాలిని సైతం నితిన్ తో కలిసి ఉన్న ఓ ఫోటోని ఇన్స్టాగ్రామ్ లో షేర్ చేస్తూ.. భర్తకు పెళ్లిరోజు శుభాకాంక్షలు తెలిపింది. వాస్తవానికి నితిన్ కన్నా ఆయన భార్య సోషల్ మీడియాలో ఎంతో యాక్టివ్ గా ఉంటుంది. ఎప్పటికప్పుడు తన భర్తకు సంబంధించిన ఫోటోలను పంచుకుంటూ ఉంటుంది.

ఇకపోతే నితిన్ - షాలినీలకు సోషల్ మీడియా వేదికగా అభిమానులు పెళ్లిరోజు శుభాకాంక్షలు తెలియజేసారు. 'భీష్మ' డైరెక్టర్ వెంకీ కుడుముల ఈ జంటకు స్పెషల్ గా విషెస్ అందజేశారు. ప్రస్తుతం నితిన్ షేర్ చేసిన బ్యూటిఫుల్ ఫోటో నెట్టింట సందడి చేస్తోంది.

కాగా, నితిన్ పెళ్లి హైదరాబాద్ లోని ఫలక్‌ నుమా ప్యాలెస్‌ లో ఘనంగా జరిగింది. లాక్ డౌన్ కారణంగా వీరి పెళ్లికి కొంతమంది సినీ రాజకీయ ప్రముఖులు మాత్రమే హాజరయ్యారు. వివాహ బంధంలో అప్పుడే రెండేళ్ల అన్యోన్యమైన దాంపత్య జీవితాన్ని పూర్తి చేసుకున్న ఈ జంట.. మరిన్ని సంతోషకరమైన వార్షికోత్సవాలు జరుపుకోవాలని ఫ్యాన్స్ కోరుకుంటున్నారు.

ఇక సినిమాల విషయానికొస్తే.. తేజ దర్శకత్వంలో 'జయం' సినిమాతో హీరోగా లాంచ్ అయిన నితిన్.. ఇటీవలే 20 ఏళ్ల సినీ కెరీర్ ను పూర్తి చేసుకున్నాడు. ప్రస్తుతం ఆయన నటించిన ''మాచర్ల నియోజకవర్గం'' సినిమా విడుదలకు సిద్దంగా ఉంది.

ప్రముఖ ఎడిటర్ ఎమ్.ఎస్. రాజశేఖర్ రెడ్డి దర్శకత్వంలో తెరకెక్కిన 'మాచర్ల నియోజకవర్గం'.. ఆగస్ట్ 12న ప్రపంచ వ్యాప్తంగా విడుదల కాబోతోంది. ఈ నేపథ్యంలో జోరుగా ప్రమోషన్స్ చేస్తున్నారు. ఇప్పటికే వచ్చిన ప్రమోషనల్ కంటెంట్ మంచి రెస్పాన్స్ తెచ్చుకోగా.. ఈ నెల 30న థియేట్రికల్ ట్రైలర్ ను లాంచ్ చేయనున్నారు.

నితిన్ సరసన కృతి శెట్టి - క్యాథరిన్ హీరోయిన్లుగా నటించారు. శ్రేష్ఠ మూవీస్ బ్యానర్ పై నితిన్ తండ్రి ఎన్.సుధాకర్ రెడ్డి - నికితా రెడ్డి ఈ చిత్రాన్ని నిర్మించారు. 'మాచర్ల..' తర్వాత హోమ్ బ్యానర్ లో వ‌క్కంతం వంశీ ద‌ర్శ‌క‌త్వంలో నితిన్ ఓ సినిమా చేయనున్నాడు.