మల్లూవుడ్ వెళుతున్న తెలుగు పిల్ల

హైద్రాబాదీ అమ్మాయి నిత్యా నరేష్ ఇప్పటికే తెలుగు సినిమాల్లో ప్రూవ్ చేసుకుంది. పెద్ద సినిమాలు కాకపోయినా.. కేరింత.. నందినీ నర్సింగ్ హోమ్ వంటి చిత్రాలతో తనలోని యాక్టింగ్ ట్యాలెంట్ ను.. గ్లామర్ యాంగిల్ ను బాగానే చూపించింది. ఇప్పుడీ భామ మలయాళ సినీ పరిశ్రమలోకి అడుగు పెట్టేస్తోంది.

ఇప్పటికే మల్లూవుడ్ లో ఓ మూవీకి సైన్ చేసేసింది నిత్యా నరేష్. హారర్ థ్రిల్లర్ జోనర్ లో రూపొందుతోన్న 'ఈ' అనే మూవీకి సంతకం చేసిందీమె. కుక్క సురేంద్రన్ దర్శకత్వంలో రూపొందుతోన్న ఈ మూవీలో లీడ్ హీరోయిన్ పాత్రనే దక్కించుకుంది నిత్య. ఈమెకు మల్లూవుడ్ లో అవకాశం రావడానికి.. నిత్య హాఫ్ మలయాళీ కావడం కూడా ఒక కారణమే. ఈమె తండ్రి తెలుగు వ్యక్తి అయినా.. తల్లి మాత్రం మలయాళీ పర్సన్. తెలుగులో ఇంకా కెరీర్ నిర్మించుకునే దశలోనే ఉన్నా.. ఇంత త్వరగా అక్కడి నుంచి పిలుపు రావడానికి ఇది కూడా ఓ కారణంగా చెప్పచ్చు.

పక్క భాషల నుంచి ఇక్కడికి వచ్చి.. టాలీవుడ్ లో అవకాశాలను అనేక మంది ఎగరేసుకుపోతుంటే.. నిత్యా నరేష్ మాత్రం పక్క రాష్ట్రం నుంచి పిలుపు అందుకుని ఆశ్చర్య పరిచింది. భాషా బేధాలు లేకుండా.. దక్షిణాదిలోని అన్ని పరిశ్రమల్లోనూ నటించడమే తన లక్ష్యంగా చెబుతోంది నిత్యా నరేష్.

Like Us on Facebook : https://www.facebook.com/Tupakidotcom/