నిత్యకు ఆ అవకాశం వస్తుందా..?

'అలా మొదలైంది' సినిమాతో తెలుగు ప్రేక్షకులకు దగ్గరైన నటి నిత్యమీనన్. వైవిధ్యమైన చిత్రాల్లో నటిస్తూ.. తనకంటూ ప్రత్యేకమైన పేరును సంపాదించుకుంది. ప్రస్తుతం తెలుగులో 'జనతా గ్యారేజ్' సినిమాలో నటిస్తుంది. అయితే ఎప్పటినుండో ఈ భామకు మెగాఫోన్ పట్టుకోవాలనే కోరిక ఉందట. ఇండస్ట్రీ లో ఉండేవాళ్లకు ఒక్క‌సారైనా కెప్టెన్ కుర్చీలో కూర్చుని యాక్ష‌న్ క‌ట్‌ లు చెప్పాల‌నిపిస్తుంది. ఈ విషయంలో హీరోలు ఎక్కువ మక్కువ చూపిస్తుంటారు.

అయితే ఇప్పుడు హీరోయిన్స్ కూడా మెగా ఫోన్ పట్టాలని ప్రిపేర్ అవుతున్నారు. ఈ వరుసలోనే 'ఎప్పటికైనా తన దర్శకత్వంలో ఓ సినిమా' చేస్తానంటోంది నిత్యా మీనన్. 'దర్శకత్వం అంటే చాలా ఇష్టం. మనసులోని భావాలను దృశ్యంగా మలచడంలోని ఆనందమే వేరు. తీరిక సమయాల్లో కథలు రాసే అలవాటు వుంది. అలా చాలా కథలు రాశా. ఆ కథలను తెరకెక్కించాలని కోరిగా వుంది' అని అంటోంది నిత్యా. మరి, నిత్యా కోరిక ఎప్పటికి తీరుతుందో చూడాలి..!