నితిన్ ప్లానింగ్ మామూలుగా లేదండోయ్

పాపం నితిన్ కి 'భీష్మ' సినిమా నుంచి ఇంతవరకూ సరైన హిట్ లేదు. 'భీష్మ' సినిమాతో మళ్లీ గాడిన పడ్డాడని అనుకుంటే, ఆ తరువాత వరుసగా మూడు ఫ్లాపులు ఇచ్చాడు. అయినా పట్టువదలని విక్రమార్కుడు మాదిరిగా హిట్టు భుజాన వేసుకుని వెళ్లడానికి తనవంతు ప్రయత్నం చేస్తూనే ఉన్నాడు. అయినా కాలం కలిసి రావడం లేదు. ప్రస్తుతం ఆయన తాజా చిత్రంగా 'మాచర్ల నియోజక వర్గం' రూపొందుతోంది. నితిన్ సొంత బ్యానర్లో నిర్మితమవుతున్న ఈ సినిమాకి ఎమ్మెస్ రాజశేఖర్ రెడ్డి దర్శకత్వం వహిస్తున్నాడు.

ఇప్పటికే ఈ సినిమా చాలా వరకూ చిత్రీకరణను జరుపుకుంది. కృతి శెట్టి కథానాయికగా అలరించనున్న ఈ సినిమాకి మహతి స్వరసాగర్ సంగీతాన్ని అందించారు. సాధ్యమైనంత త్వరగా ఈ సినిమాను పూర్తి చేసి వక్కంతం వంశీ దర్శకత్వంలో చేయనున్న ప్రాజెక్టు పైకి వెళ్లాలనే ఉద్దేశంతో నితిన్ ఉన్నాడు. 'మాచర్ల నియోజక వర్గం' విడుదల తేదీని కూడా ఇచ్చేశారు. ఆగస్టు 12వ తేదీన ఈ సినిమాను భారీ స్థాయిలో విడుదల చేయనున్నారు. ఆ దిశగా పనులను పూర్తి చేయాలనే ఉద్దేశంతో ఈ సినిమా టీమ్ ఇటలీ వెళ్లింది.

అక్కడ కొన్ని సన్నివేశాలను .. పాటలను చిత్రీకరించాలని ప్లాన్ చేశారట. అయితే చిత్రీకరణ పరంగా సీన్స్ కీ .. సాంగ్స్ కి మధ్య కాస్త గ్యాప్ వస్తుండటంతో, సమయం వృథా అవుతుందని ఒక నిర్మాతగా నితిన్ ఆలోచన చేశాడు.

ఆ గ్యాపులో .. తన తదుపరి సినిమాకి సంబంధించిన సాంగ్స్ ను చిత్రీకరిస్తే బాగుంటుందని భావించిన ఆయన , వెంటనే ఆ ఆలోచనను ఆచరణలో పెట్టాడు. నితిన్ నెక్స్ట్ మూవీ డైరెక్టర్ వక్కంతం వంశీకీ .. ఆ సినిమా హీరోయిన్ శ్రీలీలకి .. కెమెరామెన్ కీ .. కొరియోగ్రఫర్ కి మెసేజ్ వెళ్లిపోయింది. ఈ సినిమా కూడా నితిన్ సొంత బ్యానర్ లోనిదే.

అందువల్లనే నితిన్ చెప్పిన సమయానికి ఇటలీలోని లొకేషన్ కి వాళ్లంతా చేరిపోయారు. 'మాచర్ల నియోజక వర్గం' షూటింగు గ్యాపులో, వక్కంతం వంశీ సినిమాకి సంబంధించిన రెండు పాటలను బ్యూటిఫుల్ లొకేషన్స్ లో చిత్రీకరించారట. ఇలా ఒక సినిమా యూనిట్ తో తన నెక్స్ట్ సినిమాకి సంబంధించిన రెండు పాటల షూటింగు కూడా పూర్తయ్యేలా నితిన్ ప్లాన్ చేశాడు. సమయమూ .. ఖర్చు రెండూ ఆదా చేశాడు.

ఎంతైనా నిర్మాతల ఫ్యామిలీ నుంచి వచ్చాడు గదా. ఆ మాత్రం ముందుచూపు ఉంటుంది మరి. 'మాచర్ల నియోజక వర్గం' పూర్తి కాగానే, వక్కంతం వంశీ ప్రాజెక్టు రెంగ్యులర్ షూటింగు మొదలవుతుంది. ఇది భారీ యాక్షన్ ఎంటర్టైనర్ అంటున్నారు మరి!