యూవీ క్రియేష‌న్స్ బ్యానర్ లో నితిన్ సినిమా..?

యూత్ స్టార్ నితిన్ ఈ ఏడాది ఇప్పటికే రెండు సినిమాలు రిలీజ్ చేసి ఫుల్ స్పీడ్ లో ఉన్నారు. ప్రస్తుతం మేర్లపాక గాంధీ దర్శకత్వంలో ''మ్యాస్ట్రో'' అనే సినిమా చేస్తున్నాడు. ఇది హిందీలో సూపర్ హిట్ అయిన 'అంధాదున్' చిత్రానికి తెలుగు రీమేక్. రాజ్ కుమార్ ఆకెళ్ల సమర్పణలో శ్రేష్ఠ మూవీస్ బ్యానర్ పై ఎన్.సుధాకర్ రెడ్డి - నికిత రెడ్డిలు ఈ చిత్రాన్ని నిర్మిస్తున్నారు. అన్నీ అనుకున్నట్లు జరిగితే జూన్ లోనే ఈ సినిమా విడుదల కానుంది. ఇకపోతే చైతన్య కృష్ణ దర్శకత్వంలో 'పవర్ పేట' అనే సినిమాకి గ్రీన్ సిగ్నల్ ఇచ్చాడని తెలుస్తోంది. ఈ క్రమంలో తాజాగా నితిన్ మరో ప్రాజెక్ట్ కి ఓకే చెప్పాడని టాక్ వినిపిస్తోంది.

ఒకవైపు పాన్ ఇండియా ప్రాజెక్ట్స్ మరోవైపు మీడియం రేంజ్ సినిమాలు తీస్తూ ఫుల్ ఫార్మ్ లో ఉన్న యూవీ క్రియేషన్స్ బ్యానర్ లో నితిన్ హీరోగా ఓ మూవీ చేయడానికి సన్నాహాలు జరుగుతున్నాయట. అయితే ఈ ప్రాజెక్ట్ కి ఇంకా డైరెక్టర్ ఫిక్స్ అవ్వ‌లేదని తెలుస్తోంది. 'యాత్ర' ఫేమ్ మహి వి. రాఘవ్ దర్శకత్వంలో ఉండొచ్చని అంటున్నారు. కాకపోతే మ‌హి రాసుకున్న స్టోరీలో ఇద్ద‌రు హీరోలు ఉంటారట. దొరికితే దొంగ దొర‌క్క‌పోతే దొర మాదిరి స్టోరీ లైన్ తో ఈ క‌థ‌ను మ‌హి సిద్ధం చేసుకున్నాడట. మరి దీనికి నితిన్ నుంచి ఎలాంటి స్పందన వస్తుందో చూడాలి. మహి కాకపోతే వెంకీ కుడుముల లేదా మళ్ళీ మేర్ల‌పాక గాంధీ లనే నితిన్ కోసం యూవీ టీమ్ సెట్ చేసే అవకాశాలు ఉన్నాయని టాక్ నడుస్తోంది.