నితిన్.. రకుల్.. ఓ కొత్త డైరెక్టర్

హ్యాట్రిక్ హిట్లతో ఊపు మీదున్న నితిన్ కు ‘చిన్నదాన నీకోసం’ సినిమా బ్రేకులేసింది. దాని తర్వాత మళ్లీ సినిమా మొదలుపెట్టడానికి దాదాపు ఏడాది పట్టింది. ఐతే లేటైనప్పటికీ.. త్రివిక్రమ్ లాంటి స్టార్ డైరెక్టర్ తో సినిమా మొదలుపెట్టి అభిమానుల్ని సంతోష పెట్టాడు నితిన్. వీళ్లిద్దరి కాంబినేషన్ లో ఈ మధ్యే ‘అ.. ఆ’ సినిమా సెట్స్ పైకి వెళ్లగా.. తాజాగా ఇంకో ఆసక్తికర సినిమాకు శ్రీకారం చుట్టబోతున్నాడు నితిన్.

నితిన్ తో సినిమా చేయాలని ఎప్పట్నుంచో ప్రయత్నిస్తున్న కొత్త దర్శకుడు ఎం.వి.నారాయణ ఎట్టకేలకు నితిన్ నుంచి గ్రీన్ సిగ్నల్ అందుకున్నాడు. సాయితేజ ఆర్ట్ క్రియేషన్స్ బేనర్ మీద శ్రీనివాసరావు అనే కొత్త నిర్మాత ఈ సినిమాను నిర్మించబోతున్నాడు. స్టార్ హీరోయిన్ రకుల్ ప్రీత్ సింగ్ తొలిసారి నితిన్ తో జత కట్టబోతోంది.

ఈ సినిమాకు వెలిగొండ శ్రీనివాస్ కథ అందించాడు. ‘రౌడీఫెలో’ సినిమాతో దర్శకుడిగా అరంగేట్రం చేసిన కృష్ణ చైతన్య ఈ సినిమాకు మాటలు అందిస్తుండటం విశేషం. కృష్ణచైతన్య కూడా దర్శకుడిగా తన రెండో సినిమాను నితిన్ తోనే చేయాలని చూస్తున్నాడు. ప్రస్తుతానికి ఆ ప్రాజెక్టు హోల్డ్ లో ఉంది. అది మొదలయ్యే లోపు ఈ సినిమాకు మాటలు అందించబోతున్నాడు.