నేనా.. దర్శకత్వమా.. అప్పుడేనా?

సౌత్ ఇండియాలో ఈ తరం అత్యుత్తమ నటీమణుల జాబితా తీస్తే అందులో కచ్చితంగా నిత్యా మీనన్ పేరుంటుంది. గ్లామర్ హీరోయిన్ల హవా సాగుతున్న టైంలో కేవలం పెర్ఫామెన్స్ తో తన ప్రత్యేకతను చాటుకుంటూ కెరీర్ కొనసాగించింది నిత్యా. ఐతే ఏడాదిగా ఈ మలయాళ కుట్టికి అనుకున్నంతగా అవకాశాలు రావట్లేదు. సినిమాలు బాగా తగ్గిపోయాయి.

‘జనతా గ్యారేజ్’లో అంతగా ప్రాధాన్యం లేని పాత్ర చేసిన నిత్యా.. ఆ తర్వాత తెలుగులో కనిపించనే లేదు. తెలుగులో మాత్రమే కాదు.. వేరే భాషల్లోనూ ఆమె పెద్దగా సినిమాలు చేస్తున్నట్లు కనిపించడం లేదు. ఐతే నిత్యా తనంతట తానే ఈ గ్యాప్ తీసుకుందని.. దర్శకురాలు కావాలన్న తన కలను నెరవేర్చుకునే ప్రయత్నంలో కథానాయికగా సినిమాలు ఒప్పుకోవట్లేదని వార్తలొచ్చాయి ఈ మధ్య. దీనిపై నిత్యా స్పందించింది. తన గురించి జరుగుతున్న ప్రచారం కరెక్ట్ కాదని చెప్పింది.

దర్శకురాలు కావాలన్న లక్ష్యం ఉన్న మాట వాస్తవమే అని.. కానీ దానికి ఇంకా చాలా సమయం ఉందని నిత్యా చెప్పింది. నటిగా తనకింకా ఛాలెంజింగ్ రోల్స్ చాలా చేయాలని ఉందని.. తాను ప్రస్తుతానికి నటిగానే కొనసాగుతానని ఆమె వెల్లడించింది. తన గురించి ఉత్త ప్రచారాలు మానుకోవాలని ఆమె కోరింది. ప్రస్తుతం నిత్యా తమిళంలో విజయ్ హీరోగా తెరకెక్కుతున్న కొత్త సినిమాలో ముగ్గురు హీరోయిన్లలో ఒకరిగా నటిస్తోంది. ‘తెరి’ తీసిన అట్లీ ఈ చిత్రానికి దర్శకత్వం వహిస్తున్నాడు. విజయేంద్ర ప్రసాద్ కథతో ఈ సినిమా తెరకెక్కుతోంది.

Like Us on Facebook : https://www.facebook.com/Tupakidotcom/