ఆ భామలు ఇద్దరితో జూనియర్ గ్యారేజ్

యంగ్ టైగర్ ఎన్టీఆర్ నటించిన నాన్నకు ప్రేమతో చిత్రం విడుదలకు సిద్ధమవుతోంది. సంక్రాంతి పండుగకు ప్రేక్షకుల ముందుకు రానుంది ఈ చిత్రం. నాన్నకు ప్రేమతో పబ్లిసిటీ కార్యక్రమాలు పూర్తి కాగానే.. వెంటనే తన మరుసటి ప్రాజెక్ట్ స్టార్ట్ చేసేయనున్నాడు జూనియర్. ఇప్పటికే కొరటాలతో కలిసి, కొత్త సినిమా ప్రారంభానికి కొబ్బరికాయ కొట్టేశాడు.

ప్రస్తుతం స్క్రిప్ట్ వర్క్ పూర్తి చేసేసిన కొరటాల శివ.. ఇప్పుడు ప్రీ ప్రొడక్షన్ కార్యక్రమాలను కూడా ఫుల్ స్పీడ్ లో కంప్లీట్ చేస్తున్నాడు. జనతా గ్యారేజ్ అనే వర్కింగ్ టైటిల్ పై ఈ మూవీ షూటింగ్ జరుపుకోనుంది. స్టోరీ ప్రకారం ఈ సినిమాలో ఇద్దరు హీరోయిన్స్ కు ఛాన్స్ ఉండగా.. ఇప్పటికే సమంతను ఓ కేరక్టర్ కోసం ఫైనల్ చేశారు యూనిట్. ఇప్పుడు మరో హీరోయిన్ కి సంబంధించి కూడా అప్ డేట్స్ వస్తున్నాయి. స్టోరీతో పాటు తన కేరక్టర్ కి అధిక ప్రాధాన్యతను ఇచ్చే నిత్యా మీనన్.. సెకండ్ హీరోయిన్ గా నటించే అవకాశాలున్నాయి. ఇప్పటికే డైరెక్టర్ కొరటాల... నిత్యను కలిసి స్టోరీ వివరించగా.. ఈ లైన్ పై నిత్య ఆసక్తి చూపింది. అయితే.. ఇప్పటివరకూ ఆమె నుంచి గ్రీన్ సిగ్నల్ మాత్రం ఇంకా రాలేదు.

నిత్యా మీనన్ మాత్రం.. జూనియర్ తో జత కట్టేందుకు సిద్ధంగానే ఉందని తెలుస్తోంది. డేట్స్ విషయంలోనే ఆలస్యం జరుగుతోందట. జనతా గ్యారేజ్ లో మలయాళ స్టార్ మోహన్ లాల్ కీలక పాత్రలో నటిస్తుండగా.. దేవిశ్రీ ప్రసాద్ సంగీతం అందించనున్నాడు. మైత్రీ మూవీ మేకర్స్ పతాకంపై.. జనతా గ్యారేజ్ రూపొందుతోంది.