ఈసారి పక్కా.. చెల్లెలి క్యారెక్టర్లో నిత్య

సన్నాఫ్‌ సత్యమూర్తి సినిమాలో నిత్య మీనన్‌ ఓ క్యారెక్టర్‌ చేస్తోందన్న వార్త ఇలా బయటికి వచ్చిందో లేదో.. వెంటనే ఆమె వేస్తోంది చెల్లెలి క్యారెక్టర్‌ అంటూ ప్రచారం మొదలైపోయింది. ఆల్రెడీ సమంత, ఆదా శర్మ హీరోయిన్లుగా ఉన్నారు కాబట్టి.. సమంత ఇలాంటి కమర్షియల్‌ సినిమాలు చేసింది లేదు కాబట్టి.. ఆమెను బన్నీకి చెల్లెలనే అనుకున్నారంతా. కానీ సన్నాఫ్‌ సత్యమూర్తి పోస్టర్లలో బన్నీతో కలిసి స్టెప్పులేస్తున్న దృశ్యాలు చూడటంతో జనాల అంచనా తప్పని తేలిపోయింది. ఐతే ఇప్పుడు మాత్రం పక్కా అని.. నిత్య ఓ స్టార్‌ హీరో పక్కన చెల్లెలి క్యారెక్టర్‌ చేయబోతోందని సమాచారం.

ఆ హీరో మరెవరో కాదు.. అజిత్‌. తెలుగులో శౌర్యం, శంఖం, దరువు లాంటి సినిమాలు తీసిన సినిమాటోగ్రాఫర్‌ టర్న్‌డ్‌ డైరెక్టర్‌ శివ దర్శకత్వంలో ఇంతకుముందు 'వీరం' లాంటి సూపర్‌ హిట్‌ సినిమా చేసిన అజిత్‌.. మళ్లీ అతడితో ఓ సినిమా మొదలుపెట్టాడు. ఇందులో శ్రుతి హాసన్‌ కథానాయిక. ఈ సినిమాలో కథను మలుపు తిప్పే హీరో చెల్లెలి పాత్ర కోసం నిత్యను అడిగారట. ఆమె ఓకే చెప్పేసిందట. మొదట శ్రీదివ్యను ఈ క్యారెక్టర్‌ కోసం సంప్రదించారని.. ఆ తర్వాత నిత్య అయితే బాగుంటుందని ఆమెకు ఛాన్స్‌ ఇచ్చారని తెలిసింది. బన్నీ సరసన కాబట్టి సరిపోయింది కానీ.. భారీ కాయుడైన అజిత్‌ సరసన నిత్య హీరోయిన్‌గా సెట్టయ్యే ఛాన్సే లేదు. కాబట్టి అందులో ఆమెది చెల్లెలి క్యారెక్టర్‌ అనడంలో సందేహాలు పెట్టుకోనక్కర్లేదు.