`ఎన్టీఆర్‌`లో ఏఎన్నార్ లేడు

విశ్వ‌విఖ్యాత న‌ట‌సార్వ‌భౌమ - అన్న‌గారు ఎన్టీఆర్ జీవిత‌క‌థ‌ను వెండితెర‌కెక్కిస్తున్న సంగ‌తి తెలిసిందే. ఎన్టీఆర్ అనేది టైటిల్‌. బాల‌కృష్ణ టైటిల్ రోల్ పోషిస్తూ స్వ‌యంగా నిర్మిస్తున్నారు. గౌత‌మిపుత్ర శాత‌క‌ర్ణి ఫేం క్రిష్ ఈ చిత్రానికి ద‌ర్శ‌క‌త్వం వ‌హిస్తున్నారు. ఇటీవ‌లే బ‌స‌వ‌తార‌కం పాత్ర‌ధారి విద్యాబాల‌న్ ఆన్ సెట్స్ జాయిన్ అయిన సంగ‌తి తెలిసిందే.

తాజా స‌మాచారం ప్రకారం.. ఈ సినిమా తొలి షెడ్యూల్ పూర్త‌యింది. రెండో షెడ్యూల్‌ ని ఆగ‌స్టు 13 నుంచి హైద‌రాబాద్ ప‌రిస‌రాల్లో తెర‌కెక్కించ‌నున్నారు. చిత్రీక‌ర‌ణ సంగ‌తి అటుంచితే ఈ చిత్రంలో ఏఎన్నార్ పాత్ర‌లో ఎవ‌రు న‌టిస్తున్నారు? అన్న‌ది ఆస‌క్తి రేకెత్తిస్తోంది. ఈ క్రేజీ బ‌యోపిక్ లో ఏఎన్నార్ పాత్ర‌కు నాగ‌చైత‌న్యను ఎంపిక చేశార‌ని ప్ర‌చార‌మైంది. `మ‌హాన‌టి`లో ఏఎన్నార్‌ గా క‌నిపించిన చైతూ మ‌రోసారి అదే పాత్ర‌లో క‌నిపిస్తార‌ని మాట్లాడుకున్నారు. ఆ త‌ర్వాత ఏమైందో చైత‌న్య కాదు, సుమంత్ ఆ పాత్ర‌లో క‌నిపిస్తార‌ని అన్నారు. తాజాగా అదీ క్యాన్సిల్ అయ్యింద‌ని తెలుస్తోంది. అస‌లు ఎన్టీఆర్ బ‌యోపిక్‌ లో ఏఎన్నార్ పాత్ర‌నే లేద‌ట‌. ఎన్టీఆర్ - ఏఎన్నార్ మ‌ధ్య స్నేహంపై స‌న్నివేశాలు లేక‌పోవ‌డ‌మేంటో కాస్త ఆశ్చ‌ర్య‌క‌ర‌మే. దీనిపై చిత్ర‌యూనిట్ అధికారికంగా క్లారిటీ ఇవ్వాల్సి ఉంటుంది.