రజినీకాంత్ మంచి పనే చేశాడు

నెలన్నర కిందటి వరకు ‘కబాలి’కి అనుకున్న స్థాయిలో క్రేజ్ లేదే అని ఫీలయ్యాడు నిర్మాత కలైపులి థాను. కానీ ఇప్పుడు అవసరానికి మించి క్రేజ్ వచ్చేసిందే అని ఫీలయ్యే పరిస్థితి. ‘కబాలి’ టీజర్ ఆ స్థాయిలో ప్రకంపనలు రేపింది మరి. సింపుల్ గా అనిపిస్తూనే జనాల గుండెల్లోకి చొచ్చుకుపోయిందీ టీజర్. దీంతో ‘కబాలి’ మీద అంచనాలు అమాంతం పెరిగిపోయాయి. విక్రమసింహా.. లింగా డిజాస్టర్లయిన నేపథ్యంలో ‘కబాలి’ మీద అంతగా ఆసక్తి చూపించని తెలుగు బయ్యర్లు సైతం.. దీని హక్కుల కోసం ఫ్యాన్సీ రేట్లతో పోటీ పడే పరిస్థితి. మిగతా చోట్ల కూడా ‘కబాలి’ మీద అంచనాలు పెరిగిపోయాయి. బిజినెస్ బౌండరీల్ని దాటేసింది.

ఐతే ఇప్పటికే ఆకాశాన్నంటుతున్న అంచనాల్ని మరింత పెంచేయడం ఇష్టం లేక.. రజినీకాంత్ అండ్ కో ‘కబాలి’ ఆడియో వేడుకను రద్దు చేయాలని నిర్ణయం తీసుకున్నట్లుగా వార్తలొస్తున్నాయి. ఇంతకుముందు విక్రమసింహా.. లింగా సినిమాల గురించి రజినీ చాలా చెప్పాడు. కానీ అవి చతికిలబడ్డాయి. ఈ నేపథ్యంలో ఏం మాట్లాడకుండా సైలెంటుగా బరిలోకి దిగాలని రజినీ భావిస్తున్నాడట. అందుకే ఈ నెల 12న అనుకున్న ఆడియో వేడుకను రద్దు చేసి.. నేరుగా పాటల్ని మార్కెట్లోకి రిలీజ్ చేయబోతున్నారట. తమిళంలో వేడుక చేస్తే తెలుగులో కూడా చేయాలని.. మళ్లీ హిందీ వెర్షన్ కు కూడా తప్పదని.. ఇలా అన్ని చోట్లా తిరగడానికి రజినీకి ఓపిక లేకపోవడం కూడా ఇందుకు కారణమని అంటున్నారు. ఇది అభిమానులకు నిరాశ కలిగించే విషయమే అయినా.. ‘కబాలి’ మీద హైప్ మరీ పెరిగిపోకుండా మంచి పనే చేశాడు సూపర్ స్టార్.