ఆ డైరెక్ట‌రు ఇప్ప‌టికీ బైక్‌ పైనే

అదో సినిమా ఆఫీసు. డైరెక్ట‌ర్ ఇంట‌ర్వ్యూ ఉంద‌ని మీడియాకి క‌బురు. అంతా టంచ‌నుగా స‌మ‌యానికి ఆఫీసుకి చేరుకున్నారు. ద‌ర్శ‌కుడు మ‌రో ఐదు నిమిషాల్లో వ‌స్తాడ‌ని అక్క‌డున్న సిబ్బంది మీడియాతో చెప్పారు. మీడియా ప్ర‌తినిధులంతా డైరెక్ట‌రు గురించే ఎదురు చూస్తున్నారు. డైరెక్ట‌రు కాబ‌ట్టి ఏ కార్లోనో వ‌స్తాడు కదా అని రోడ్డుపై వ‌చ్చే కార్ల వంకే చూస్తూ క‌బుర్ల‌లో ప‌డిపోయారంతా. ఇంత‌లో కాలేజీ కుర్రాడిలా బ్యాగ్ వేసుకొని ఆఫీసు ముందు బైకు ఆపి హెల్మెట్ తీసుకుంటూ ఆఫీసులోకి వ‌చ్చాడు ఒకాయ‌న‌. ఎవ‌రో మ‌న‌లాంటి మీడియా కుర్రాడే అయ్యుంటార‌ని అనుకొన్నారంతా. తీరా గ‌మ‌నిస్తే డైరెక్టరు.

ఆయ‌నేం చిన్న డైరెక్ట‌రు కాదు. వెంక‌టేష్‌ - మ‌హేష్‌ బాబులాంటి సూపర్‌ స్టార్ల‌తో సినిమా తీసిన డైరెక్ట‌రు. కానీ ఇప్ప‌టికీ కారు లేదాయ‌న‌కి. ఎక్క‌డికెళ్లినా ఆయ‌న బైకుమీదే వెళ‌తాడు. సింపుల్‌ గా వుండ‌టాన్నే ఇష్ట‌ప‌డ‌తాడు. అందుకే సింపుల్ బ‌ట్ బ్యూటిఫుల్ అంటూ సినిమాలు తీస్తుంటాడాయ‌న‌. ఆ ద‌ర్శ‌కుడు ఎవ‌రో ఈపాటికే అర్థ‌మైవుంటుంది. అవును మీరు అనుకుంటున్నట్టుగా శ్రీకాంత్ అడ్డాల‌నే. కొత్త‌బంగారులోకంతో ప్ర‌యాణం మొద‌లుపెట్టిన ఆయ‌న సీత‌మ్మ వాకిట్లో సిరిమ‌ల్లె చెట్టు, ముకుంద‌లాంటి సినిమాలు తీశాడు. ప్ర‌తి సినిమా కూడా స‌క్సె్స్సే. ఆ సక్సెస్‌ ని ఇంత‌కూడా త‌ల‌కెక్కించుకోలేదాయ‌న‌. ఆ విజ‌యాలు ఆయ‌న జీవితంపై కూడా అస‌లేమాత్రం ప్ర‌భావం చూప‌లేదు.

అందుకే మ‌హేష్ త‌ర‌చుగా శ్రీకాంత్ అడ్డాల‌ని పొగుడుతుంటాడు. స్వ‌చ్ఛంగా వుండే ద‌ర్శ‌కుడ‌ని - ఆయ‌న ఇండ‌స్ట్రీలో కూడా ఎవ్వ‌రితోనూ పెద్ద‌గా క‌ల‌వ‌డ‌నీ, ఇప్పటికీ బైక్‌ పైనే తిరుగుతుంటాడ‌ని మ‌హేష్ చెప్పుకొచ్చాడు. మ‌హేష్ మాట‌లు అక్ష‌రాలా నిజం. మ‌రి శ్రీమంతుడు సినిమాని తీసినందుకు కొర‌టాల శివ‌కి ఆడి కార్ బ‌హుమ‌తిగా ఇచ్చిన మ‌హేష్ ఈ సినిమాతో శ్రీకాంత్ అడ్డాల‌కి కూడా కారు కొనిస్తాడేమో చూడాలి.