ఈసారి ఏ రీమేక్‌ టైగర్‌?

బాలీవుడ్‌ యంగ్‌ హీరో టైగర్‌ ష్రాప్‌ వరుస చిత్రాలతో దూసుకు పోతున్నాడు. ఈయన వరుసగా రీమేక్‌ చిత్రాలతో సక్సెస్‌ లను దక్కించుకుంటూ రీమేక్‌ హీరోగా గుర్తింపు దక్కించుకున్నాడు. తెలుగులో సూపర్‌ హిట్‌ అయిన ‘వర్షం’ మూవీని ‘బాగీ’ అంటూ రీమేక్‌ చేసిన టైగర్‌ ష్రాప్‌ ఆ తర్వాత కూడా తెలుగు మూవీ ‘క్షణం’ను ‘బాగీ 2’ గా రీమేక్‌ చేశాడు. టైగర్‌ కెరీర్‌ లో ఆ రెండు సినిమాలు కూడా మంచి విజయాన్ని సొంతం చేసుకున్నాయి. రెండు వేరు వేరు సినిమాలే అయినా కూడా సేమ్‌ టైటిల్‌ తో తెరకెక్కించడం బాలీవుడ్‌ లో కొత్త ట్రెండ్‌ కు తెర లేపినట్లయ్యింది.

తాజాగా ‘బాగీ 3’ చిత్రానికి ఏర్పాట్లు మొదలయ్యాయి. సాజిద్‌ నడియావాలా ఇటీవలే బాగీ 3ను అధికారికంగా ప్రకటించాడు. ప్రస్తుతం ప్రీ ప్రొడక్షన్‌ వర్క్‌ జరుగుతుందని - సినిమాను 2020వ సంవత్సరం మార్చి 6న విడుదల చేయబోతున్నట్లుగా అధికారికంగా ప్రకటించారు. వచ్చే ఏడాది సమ్మర్‌ లో సినిమా రెగ్యులర్‌ షూటింగ్‌ ను ప్రారంభించాలని భావిస్తున్నారట.

ఇప్పటి వరకు రెండు రీమేక్‌ లతో బాగీ - బాగీ 2 లను చేసిన టైగర్‌ ష్రాప్‌ మూడవ పార్ట్‌ ను కూడా ఖచ్చితంగా మరేదైనా మూవీ రీమేక్‌ గానే చేస్తారని అంతా భావిస్తున్నారు. అయితే ఈసారి ఏ మూవీని రీమేక్‌ చేయబోతున్నారనే విషయంపై మాత్రం క్లారిటీ ఇవ్వలేదు. తెలుగు సినిమానే రీమేక్‌ చేస్తారా లేదంటే తమిళంలోది తీసుకుంటున్నారా అనే విషయంపై సినీ వర్గాల్లో చర్చ జరుగుతుంది. అయితే ఈసారి సాజిద్‌ సొంత కథతో బాగీ 3ని చేయాలని భావిస్తున్నట్లుగా కూడా వార్తలు వస్తున్నాయి. ఇక బాగీ 2 చిత్రంలో హీరోయిన్‌ గా నటించిన టైగర్‌ ష్రాప్‌ రియల్‌ లైఫ్‌ లవర్‌ దిశా పటానీ ఈ మూడవ పార్ట్‌ లో కూడా ఉంటుందా అనే చర్చలు జరుగుతున్నాయి. బాగీ 3 గురించిన ఆ విషయాలు ఆ సినిమా ప్రారంభం అయితే కాని తెలియదు.