సాహో విడుదల అప్పుడేనా!

బాహుబలి తర్వాత వస్తున్న సినిమాగా ప్రభాస్ సాహో మీద మాములు అంచనాలు లేవు. ఇప్పటికే దుబాయ్ లో కీలకమైన షెడ్యూల్ పూర్తి చేసుకున్న ఈ యాక్షన్ థ్రిల్లర్ ప్రస్తుతం రామోజీ ఫిలిం సిటీలో షూటింగ్ జరుపుకుంటోంది. ప్రభాస్ కూడా ఇందులో పాల్గొంటున్నాడు. ఎప్పటికప్పుడు బ్రేకులు పడుతున్నా ప్లానింగ్ ప్రకారం ఈ మధ్యకాలంలో కాస్త వేగం పుంజుకున్న సాహో షూటింగ్ విడుదల విషయంలో మాత్రం క్లారిటీ మిస్ అవుతోంది. ఇప్పటికీ డేట్ ఫలానా అని దర్శకుడు సుజిత్ తో సహా నిర్మాతలెవరు చెప్పలేకపోతున్నారు. వేసవి అని తెలుస్తున్నప్పటికీ అది ఏ టైంలో అనే కన్ఫ్యూజన్ తెగడం లేదు. ఏప్రిల్ మొదటి వారాన్ని మహేష్ మహర్షి తీసేసుకున్నాడు. ఎంత లేదన్నా మూడు వారాలైనా దాని ప్రభావం ఉంటుంది. మరోవైపు చిరంజీవి సైరాని మే 9న తెచ్చేందుకు టీమ్ బాగానే కష్టపడుతోంది. కాకపోతే ఖచ్చితంగా వస్తాం అని రామ్ చరణ్ సైతం చెప్పలేకపోతున్నాడు.

ఇవి చాలా క్రేజీ సినిమాలు కావడంతో వీటి విడుదల విషయంలో గ్యాప్ చాలా ముఖ్యం. సాహో పూర్తి కాకముందే జిల్ ఫేమ్ రాధాకృష్ణ దర్శకత్వంలో మరో కొత్త సినిమా ప్రభాస్ మొదలుపెట్టేస్తాడు అనే వార్తలు వచ్చాయి కానీ తర్వాత మాత్రం సైలెంట్ అయిపోయింది. ఇప్పుడు సాహో కేవలం టాలీవుడ్ కు సంబందించిన సినిమా కాదు. మూడు భాషల్లో ఏక కాలంలో తీస్తున్నారు. యాక్షన్ పార్ట్ యధాతధంగా ఉంటుంది కానీ టాకీ సీన్స్ మాత్రం పదే పదే తీయాల్సి ఉంటుంది. కాబట్టి సాహో డేట్ చెప్పడంలో ఇబ్బంది పడుతున్నారు మేకర్స్. డేట్ ముందుగా అనుకోకపోతే మరో చిక్కు ఉంది. హిందీ వెర్షన్ కూడా ఉంది కాబట్టి అక్కడ భారీ విడుదల ఏమున్నాయో చూసుకుని దానికి అనుగుణంగా ప్లాన్ చేయాలి. లేదంటే తేడాలొచ్చేస్తాయి. గ్రీన్ మ్యాట్ వేసి షూటింగ్ జరుపుకుంటున్న సాహోలో గ్రాఫిక్స్ కి చాలా ప్రాధాన్యం ఉంది. అందుకే పోస్ట్ ప్రొడక్షన్ కోసమే నాలుగైదు నెలలు కేటాయించబోతున్నారట. మరి ప్రభాస్ వీలైనంత త్వరగా ఈ ఫ్యాన్స్ టెన్షన్ కి చెక్ పెట్టి డేట్ ని ప్రకటిస్తే బెటర్.