సూపర్ స్టార్ వచ్చినా మనోళ్ళకు ఎక్కట్లేదు

రజినీకాంత్ సినిమాల్లో ఈ మధ్య జనాలను ముఖ్యంగా తెలుగు ఆడియన్స్ ను మెప్పించిన సినిమా ఏదీ లేదు. టాలీవుడ్ స్టార్ హీరోలతో సమానంగా.. ఇంకా చెప్పాలంటే.. అంతకు మించి ఇమేజ్ ఉందని చెప్పుకోవడమే కానీ.. అవేవీ కలెక్షన్స్ లో కనిపించడం లేదు. కాకపోతే రిలీజ్ కి ముందు క్రేజ్ కం బజ్ మాత్రం బాగానే ఉండేది.

కబాలి రిలీజ్ కి ముందు ఉన్న రజినీ మేనియా చూశాం. లింగ రిలీజ్ సమయంలో కూడా జనాలు బాగానే ఆసక్తి చూపించారు. కానీ కాలా విషయానికి వచ్చేసరికి ఎవరిలోనూ ఇసుమంత కూడా ఆశలు.. అంచనాలు లేవు. రజినీకాంత్ సినిమా వస్తోందనే సందడి అస్సలు ఏ మాత్రం కనిపించడమే లేదు. రజినీ బొమ్మ కనిపిస్తేనే వెర్రెత్తిపోయే అభిమానులు ఉన్న రేంజ్ నుంచి.. స్వయంగా సూపర్ స్టార్ వచ్చి ప్రచారం చేసుకున్నా అసలు పట్టించుకోవడమే మానేసిన సిట్యుయేషన్ కనిపిస్తోంది.

కాలా అడ్వాన్స్ బుకింగ్స్ ను చూస్తే.. రజినీ నుంచి మరో కొచ్చాడయాన్ తరహా సినిమా రాబోతోందా అనే అనుమానాలు రావడం సహజం. అసలు జనాలు ఈ సినిమాను చూసేందుకు కొంచెమైనా ఆసక్తి చూపిస్తున్నారా అంటే.. ఇప్పటికైతే అసలు లేదనే అనిపించక మానదు. కాలా థియేటర్లలోకి వచ్చి.. ఏమైనా మంచి టాక్ తెచ్చుకుంటే.. అప్పుడు చూద్దాంలే అన్నట్లుగా ఉంది టాలీవుడ్ ఆడియన్స్ వాలకం. ఈ తరహా సిట్యుయేషన్.. రజినీ లాంటి స్టార్ హీరోకి ఏర్పడడం దారుణమైన విషయమే.