కుర్ర హీరోల‌కు భామలు క‌రువ‌య్యారు

అప్ప‌ట్లో టాలీవుడ్‌ లో హీరోయిన్ల కొర‌త పెద్ద స‌మ‌స్య అయి కూచుంది. వ‌య‌సు ముదిరిన సీనియ‌ర్ హీరోల స‌ర‌స‌న న‌టించేందుకు ఎవ‌రూ ముందుకు రావ‌డం లేద‌న్న వార్త‌లొచ్చాయి. బాల‌య్య‌ - వెంకీ లాంటి హీరోల స‌ర‌స‌న న‌టించ‌డానికి కుర్ర హీరోయిన్‌ లు ముందుకు రాలేదు. నిత్యా మీన‌న్ లాంటి హీరోయిన్ అస‌లు వెంకీ స‌ర‌స‌న న‌టించ‌నే న‌టించ‌న‌ని చెప్పింది. అయితే ఆ త‌ర్వాత హీరోల విష‌యంలో ఆ రేంజులో కంప్ల‌యింట్ రానేలేదు.

ఇటీవ‌లి కాలంలో సీనియర్ మోస్టులైన బాల‌య్య‌కు సైతం యంగ్ హీరోయిన్‌ లు దొరికేస్తున్నారు. అయితే టాలీవుడ్‌ లో యంగ్ హీరోల‌కు మాత్రం హీరోయిన్‌ లు దొర‌క‌క‌పోవ‌డ‌మేంటో అర్థం కాని ప‌రిస్థితి. ఇటీవ‌లి కాలంలో వ‌రుస‌గా ఫ్లాపులు అందుకుంటున్న ఓ టాలీవుడ్ యంగ్ హీరో త‌నీష్ ఓ కొత్త సినిమాకి రెడీ అవుతున్నాడ‌ని అప్ప‌ట్లో వార్త‌లొచ్చాయి. అయితే అత‌గాడికి హీరోయిన్ క‌రువైంద‌ని తెలుస్తోంది. స్టార్ హీరో అయిపోతాడ‌నుకున్న త‌రుణ్ అంటేనే హీరోయిన్లంతా ఆమ‌డ దూరంలో ఉంటున్నార‌ట‌. అత‌గాడు కెరీర్ ఆరంభం వ‌రుస‌గా హిట్లు కొట్టిన‌వాడే. మ‌ధ్య‌లో కొన్ని ఇత‌ర‌త్రా కార‌ణాల వ‌ల్ల కెరీర్ నాశ‌న‌మైంది. ఇప్పుడు అత‌డు క‌న్న‌డ‌లో ఓ సినిమా చేసేందుకు రెడీ అవుతున్నాడ‌ని తెలిసింది. ఇప్ప‌టికే సంప్ర‌దింపులు, క‌థా చ‌ర్చ‌లు సాగుతున్నాయి. అయితే అత‌డికి హీరోయిన్ కొర‌త ఏర్ప‌డింద‌ని అంటున్నారు.

ఇంచుమించు మ‌రో యువ‌హీరో ప‌రిస్థితి కూడా ఇలానే ఉంద‌ని వార్త‌లొస్తున్నాయి. స‌క్సెస్ ఉంటేనే ఏదైనా ఇక్క‌డ‌. సీనియ‌ర్‌, జూనియ‌ర్ అనే తేడా లేనేలేదు. స్వింగులో ఉన్న హీరోకి హీరోయిన్ స‌మ‌స్య ఉండ‌దు. ఎగిరి గంతేసి ఓకే చెబుతారు. ఫ‌లానా హీరో ఫ్లాపుల్లో ఉన్నాడు అంటే ఎవ‌రైనా మొహం చాటేసేస్తారు. అదీ సంగ‌తి.