మురుగదాస్ ఏం మారినట్లు?

స్పైడర్’తో మామూలు ఎదురు దెబ్బ తినలేదు మురుగదాస్. అతడి సినిమా అంటే మినిమం గ్యారెంటీ అని ఆశించిన జనాలకు పెద్ద షాకే తగిలింది. కెరీర్లో ఎన్నడూ చూడని అతి పెద్ద డిజాస్టర్‌ ను ఖాతాలో వేసుకున్నాడు మురుగదాస్. ఈ చిత్రంలో మురుగదాస్ ముద్రే కనిపించలేదు. ఐతే ఈ సినిమా ఫలితం మురుగ కెరీర్ మీద పెద్దగా ప్రభావం చూపించలేదు. విజయ్ లాంటి స్టార్ హీరోతో సన్ పిక్చర్స్ లాంటి బడా నిర్మాణ సంస్థ మురుగ తన తర్వాతి సినిమా చేశాడు. ‘స్పైడర్’ అనేది మురుగ సినిమా కాదన్న భావనకు వచ్చిన జనాలు.. ‘సర్కార్’తో తనేంటో రుజువు చేస్తాడని ఆశించారు. దీని ప్రోమోలు కూడా ఆ నమ్మకాన్ని పెంచాయి. కానీ తీరా సినిమా చూస్తే మాత్రం మళ్లీ ప్రేక్షకులకు నిరాశ తప్పలేదు. ఈ సినిమాలో కూడా మురుగదాస్ ముద్రేమీ కనిపించడం లేదు.

అటు తమిళంలో.. ఇటు తెలుగులో పోటీనే లేకపోవడం.. దీపావళి సీజన్లో రిలీజ్ కావడంతో.. కాంబినేషన్ క్రేజ్.. విజయ్ ట్రాక్ రికార్డు.. అతడి ఫాలోయింగ్.. అన్నీ కలిసొచ్చి ఈ చిత్రం భారీ ఓపెనింగ్స్ అయితే తెచ్చుకుంది. కానీ కంటెంట్ పరంగా చూస్తే మాత్రం ‘సర్కార్’ సాధారణమైన సినిమానే. మురుగదాస్-విజయ్ కాంబినేషన్లో ఇంతకుముందు వచ్చిన ‘తుపాకి’.. ‘కత్తి’ దరిదాపుల్లోనూ ఇది నిలవదు. వసూళ్ల మాటెలా ఉన్నప్పటికీ మురుగదాస్ స్థాయికి తగ్గ సినిమా ఇది కాదని పెదవి విరిచారు విశ్లేషకులు.. జనాలు. ‘స్పైడర్’ తర్వాత మురుగదాస్ స్టైల్ మార్చేస్తాడని.. తన స్థాయి చూపిస్తాడని అన్న వాళ్లంతా ఇప్పుడు సైలెంటైపోయారు. ఈ సినిమా విజయంలో మురుగ క్రెడిట్ చాలా తక్కువ అన్నది మాత్రం స్పష్టం. మరి తన తర్వాతి సినిమాలో అయినా తన స్థాయిని మురుగ చూపిస్తాడేమో చూడాలి.