సూపర్ స్టార్ ని మిగతా స్టార్స్ పట్టించుకోవడం లేదా...?

ప్రస్తుతం టాలీవుడ్ లో ‘బీ ద రియల్ మ్యాన్’ ఛాలెంజ్ నడుస్తుంది. అర్జున్ రెడ్డి డైరెక్టర్ సందీప్ రెడ్డి వంగా స్టార్ట్ చేసిన ఈ ఛాలెంజ్ ఇప్పుడు స్టార్ హీరోల వరకూ వెళ్ళింది. ఉత్త‌మ పురుషులెవ‌రూ ఇంట్లోని మ‌హిళ‌ల‌తో ఇలాంటి క్వారంటైన్ టైమ్‌లో ప‌నిచేయించ‌రంటూ ‘బీ ద రియల్ మ్యాన్’ ఛాలెంజ్‌ ను ముందుకు తీసుకెళ్తున్నారు. సందీప్ రెడ్డి వంగా మొదట ఈ ఛాలెంజ్ ను దర్శకుడు రాజమౌళి కి విసరగా.. రాజమౌళి ఛాలెంజ్ ను స్వీకరించి తన ఇంటిని శుభ్రం చేసి ఆ ఛాలెంజ్ ను కాస్తా ఎన్టీఆర్ - రామ్ చరణ్‌లకు, కీరవాణి, సుకుమార్, శోభు యార్లగడ్డలకు విసిరిన విషయం తెలిసిందే. దీంతో ఈ సవాలును స్వీకరించిన ఎన్టీఆర్‌ తన ఇంట్లో అంట్లు శుభ్రం చేస్తూ.. ఇల్లు తుడుస్తూ.. ఇంటి ముందున్న చెత్తను ఊడ్చేశాడు. ప్రేమ ఆప్యాయతలే కాదు..ఇంట్లోని పనులను కూడా పంచుకుందాం.. అలా పంచుకుంటే వచ్చే సరదానే వేరు అంటూ పోస్ట్ పెట్టాడు. అంతేకాదు 'బాబాయి బాలకృష్ణ, చిరంజీవి గారు, నాగార్జున బాబాయ్, వెంకటేశ్ గారు, కొరటాల శివ గారికి ఈ సవాలు విసురుతున్నాను’ అని జూనియర్ ఎన్టీఆర్ తెలిపాడు. మరోవైపు రామ్ చరణ్ కూడా ఈ ఛాలెంజ్ ని స్వీకరించి బట్టలు సర్దుతూ.. మాప్‌ తో ఫ్లోర్ క్లీన్ చేస్తూ.. మొక్కలకు నీళ్లు పోయడంతో పాటు భార్య ఉపాసనకు కాఫీ పెట్టిచ్చారు. "ఇంటి పనులు చేయడానికి గర్వపడదాం.. పని భారాన్ని పంచుకోవడం ద్వారా మహిళలకు సహాయం చేసి రియల్ మ్యాన్ అనిపించుకుందాం.." అంటూ పోస్ట్ చేసాడు. అంతేకాకుండా దర్శకుడు త్రివిక్రమ్, బాలీవుడ్ హీరో రణ్‌వీర్ సింగ్, రానా దగ్గుబాటి, శర్వానంద్ లను ఈ ‘బీ ద రియల్‌ మెన్‌’ ఛాలెంజ్‌కు నామినేట్ చేశారు.

అయితే ఇక్కడి దాకా బాగానే ఉంది కానీ సందీప్ వంగా - రాజమౌళి - ఎన్టీఆర్ - చరణ్ లు దాదాపు అందరు స్టార్స్ కి, స్టార్ డైరెక్టర్లుకి ఛాలెంజ్ విసరగా సూపర్ స్టార్ మహేష్ బాబుని మాత్రం ఎవరూ నామినేట్ చేయలేదు. ఇప్పుడు ఇదే సోషల్ మీడియాలో చర్చకు దారితీసింది. దీంతో వీరికి మహేష్ బాబు అంటే ఇండస్ట్రీలో పడదని మరోసారి నిరూపితమైందని ఒక వర్గం అంటే.. ఛాలెంజ్ ఇప్పుడే కదా స్టార్ట్ అయింది ముందు రోజుల్లో నామినేట్ చేసే అవకాశం ఉందంటూ మరోవర్గం సోషల్ మీడియా వేదికగా కామెంట్స్ చేసుకుంటున్నారు. వాస్తవానికి బాలీవుడ్ స్టార్స్ ని కూడా నామినేట్ చేసిన టాలీవుడ్ స్టార్స్ ఇక్కడి సూపర్ స్టార్ ని మర్చిపోయారు. ఎన్టీఆర్ - చరణ్ - మహేష్ బాబు ముగ్గురూ ఎంత క్లోజ్ గా ఉంటారో ఇండస్ట్రీలో అందరికి తెలిసిన విషయమే. కానీ ఈ విషయంలో మహేష్ ని ఎందుకు సవాలు చేయలేదో మరి. అయితే ఇప్పుడు ఎన్టీఆర్ ఛాలెంజ్ ని స్వీకరించిన మెగాస్టార్ చిరంజీవి, కొరటాల శివలు మహేష్ బాబుని ఈ ఛాలెంజ్ కి నామినేట్ చేస్తారేమో చూడాలి. ఎందుకంటే వీరి మధ్య మంచి అనుబంధం ఉంటుందని అందరికి తెలుసు. సో వీరు ఛాలెంజ్ చేసే ఛాన్సెస్ ఉన్నాయి. అంతేకాకుండా త్రివిక్రమ్ శ్రీనివాస్ - మహేష్ కి మధ్య కూడా మంచి రాపో ఉంది. త్రివిక్రమ్ అయినా మహేష్ ని ఛాలెంజ్ చేసే అవకాశం ఉంది. ఏదేమైనా పిల్లలతో ఆడుకుంటూ.. ఫ్యామిలీతో ఎంజాయ్ చేసే సూపర్ స్టార్ ని చూసిన అభిమానులు ఇంటిపని - వంటపని చేసే మహేష్ ని చూడాలని ఆసక్తిగా ఎదురు చూస్తున్నారు.