మహేష్‌ పై ఆశ వదులుకున్న మణిరత్నం

ఎన్నో అద్బుతమైన చిత్రాలను అందించి తమిళంతో పాటు తెలుగులో కూడా భారీ ఫ్యాన్‌ ఫాలోయింగ్‌ ను సంపాదించుకున్న దర్శకుడు మణిరత్నం కెరీర్‌ లో కాస్త ఒడుదొడుకుల తర్వాత మళ్లీ ఇప్పుడిప్పుడే కుదురు కుంటున్నాడు. చాలా కాలంగా దక్కని సక్సెస్‌ ను తాజాగా ‘చెక్క చివంత వానం’ చిత్రంతో దక్కించుకున్నాడు. తెలుగులో కూడా ఆ చిత్రం ‘నవాబ్‌’ గా మంచి విజయాన్ని సొంతం చేసుకుంది. చాలా కాలంగా ఎదురు చూస్తున్న సక్సెస్‌ దక్కడంతో ఎప్పటి నుండో వాయిదా వేస్తూ వస్తున్న తన డ్రీమ్‌ ప్రాజెక్ట్‌ ను మణిరత్నం దుమ్ము దులిపేందుకు సిద్దం అవుతున్నాడు.

రెండు సంవత్సరాల క్రితం మణిరత్నం ‘పొన్నియన్‌ సెల్వన్‌’ నవల ఆధారంగా ఒక చిత్రాన్ని తెరకెక్కించాలని తమిళ స్టార్‌ హీరో విజయ్‌ మరియు తెలుగు సూపర్‌ స్టార్‌ మహేష్‌ బాబును సంప్రదించాడు. ఆ సమయంలో మణిరత్నం వరుసగా ఫ్లాప్‌ లలో ఉన్నాడు. దాంతో ఇద్దరు కూడా కాస్త వెనుకా ముందు ఆడారు. దాంతో ఆ ప్రాజెక్ట్‌ ను అప్పుడు పక్కకు పెట్టేశాడు. ఇప్పుడు సక్సెస్‌ రావడంతో వెంటనే ఆ ప్రాజెక్ట్‌ ను మొదలు పెట్టేందుకు సిద్దం అయ్యాడు. అయితే ఇప్పుడు మహేష్‌ బాబును ఈ చిత్రంలోకి తీసుకోవాలని మణిరత్నం భావించడం లేదట.

విజయ్‌ - మహేష్‌ బాబులను కలపాలని చేసిన ప్రయత్నం అంత సులభంగా వర్కౌట్‌ కాదని నిర్ణయించుకున్న దర్శకుడు మణిరత్నం తమిళ హీరోలతోనే సినిమాను చేయాలనే నిర్ణయానికి వచ్చినట్లుగా తెలుస్తోంది. మహేష్‌ డేట్స్‌ కోసం ఎదురు చూసి టైం వృదా చేసుకోవద్దని మణిరత్నం భావిస్తున్నాడట. అందుకే విజయ్‌ తో పాటు ఈ చిత్రంలో తమిళ స్టార్‌ హీరో విక్రమ్‌ ను ఎంపిక చేయాలని భావిస్తున్నాడట. ఇక కీలక పాత్రలో శింబును ఎంపిక చేసేందుకు మణిరత్నం ప్లాన్‌ చేస్తున్నాడు. విజయ్‌ మరియు శింబులు ఇప్పటికే మణిరత్నంకు ఓకే చెప్పారని - విక్రమ్‌ మాత్రం ఇంకా తన నిర్ణయాన్ని చెప్పలేదని తెలుస్తోంది. తమిళంలో స్టార్‌ హీరోలైన ఈ ముగ్గురు ఒకే సినిమాలో కనిపిస్తే తమిళనాట మాత్రమే కాకుండా సౌత్‌ లో ఈ చిత్రం పెద్ద చిత్రంగా నిలిచే అవకాశం ఉందని తమిళ సినీ వర్గాల వారు నమ్మకం వ్యక్తం చేస్తున్నారు.