సైలెంట్ అయిపోయిన విక్టరీ..!

టాలీవుడ్ సీనియర్ హీరోలైన మెగాస్టార్ చిరంజీవి మరియు నటసింహం నందమూరి బాలకృష్ణ ప్రస్తుతం పలు క్రేజీ ప్రాజెక్ట్స్ తో బిజీగా ఉన్నారు. ఈ ఏడాది ఇప్పటికే రెండు సినిమాలు రిలీజ్ చేసిన చిరు.. సంక్రాంతికి మరో చిత్రాన్ని రెడీ చేస్తున్నారు.. ఇంకో సినిమాని సెట్స్ మీద ఉంచారు. గతేడాది సక్సెస్ ట్రాక్ ఎక్కిన బాలయ్య కూడా పెద్ద పండక్కి వస్తున్నాడు.. తదుపరి మూవీని ఇప్పటికే అనౌన్స్ చేశారు. ఈ ఏడాది రెండు సినిమాలతో ప్రేక్షకులను పలకరించిన కింగ్ అక్కినేని నాగార్జున.. తనయుడితో కలిసి తన వందో చిత్రం చేయడానికి సన్నాహాలు చేసుకుంటున్నారు. అయితే మరో సీనియర్ హీరో విక్టరీ వెంకటేష్ నెక్స్ట్ ప్రాజెక్ట్ పై ఎలాంటి క్లారిటీ రావడం లేదు.

వెంకటేష్ కెరీర్ ప్రారంభం నుంచీ తనదైన శైలిలో పెద్దగా గ్యాప్ రాకుండా సినిమాలు చేసుకుంటూ వస్తున్నారు. స్టార్ డమ్ - ఇమేజ్ అనే లెక్కలను పక్కన పెట్టి.. కథాబలమున్న సినిమాలకు ప్రాధాన్యతనిస్తున్నారు. ఓవైపు వినోదభరితమైన కుటుంబ కథా చిత్రాలు చేస్తూనే.. మరోవైపు యాక్షన్ ఎంటర్టైనర్స్ తో మెప్పిస్తున్నారు. ఎప్పుడూ యంగ్ హీరోలతో పోటీగా సినిమాలు చేసే వెంకీ.. ఇప్పుడు ఎక్కువ సినిమాలకు సైన్ చేయడం లేదు.

పాండమిక్ టైంలో 'నారప్ప' 'దృశ్యం 2' వంటి డైరెక్టర్ ఓటీటీ రీమేక్ చిత్రాలతో ప్రేక్షకులను అలరించారు వెంకటేష్. ఈ ఏడాది సమ్మర్ లో వరుణ్ తేజ్ తో కలిసి 'ఎఫ్ 3' సినిమాతో వచ్చాడు. ఇవి మూడు కూడా అప్పుడెప్పుడో కమిటైన ప్రాజెక్ట్స్. ఇటీవల 'ఓరి దేవుడా' సినిమాలో గెస్ట్ రోల్ లో కనిపించారు. అయితే వెంకీ తర్వాతి ప్రాజెక్ట్ గురించి ఇప్పటికి ఎటువంటి సమాచారం లేదు.

ఓ పక్క సీనియర్ హీరోలంతా వరుస పెట్టి సినిమాలకు సైన్ చేస్తుంటే.. వెంకటేష్ నెమ్మదిగా వెళ్తుండటంపై దగ్గుబాటి అభిమానులు నిరుత్సాహానికి గురవుతున్నారు. ఆ మధ్య పలువురు దర్శకులతో వెంకీ వర్క్ చేయనున్నట్లు వార్తలు వచ్చాయి కానీ.. ఏదీ నిజం కాలేదు. అయితే అగ్ర నటుడు తదుపరి చిత్రానికి కమిట్ అవ్వకపోవడానికి కారణం ఆధ్యాత్మికత భావనే అని రూమర్స్ చక్కర్లు కొడుతున్నాయి.

వెంకటేష్ ఆధ్యాత్మిక భావాలు కలిగిన వ్యక్తి అని అందరికీ తెలుసు. అతను భగవాన్ రమణ మహర్షి మరియు సాయిబాబాలకు అనుచరుడిగా ఉన్నారు. క్రీస్తు, ప్రవక్త మరియు సిక్కు గురువుల బోధనలను కూడా నమ్ముతాడని అంటుంటారు. ప్రస్తుతం వెంకీ ఆధ్యాత్మిక తపనలో ఉన్నారని.. అందుకే సినిమాలకు కాస్త విరామం తీసుకున్నారని ఇండస్ట్రీ వర్గాల్లో టాక్ నడుస్తోంది.

అయితే డిసెంబర్ 13న తన పుట్టినరోజు సందర్భంగా వెంకటేష్ తన నెక్స్ట్ ప్రాజెక్ట్‌ గురించి ప్రకటన ఇవ్వాలని అభిమానులు కోరుకుంటున్నారు. తమ ఫేవరెట్ హీరో తదుపరి సినిమా ఏంటి? ఏ డైరెక్టర్ తో వర్క్ చేస్తాడు? అనే విషయాలు తెలుసుకోడానికి వారు ఉత్సాహం చూపిస్తున్నారు. మరి వెంకీ అందరికీ బర్త్ డే ట్రీట్ ఇస్తాడేమో చూడాలి.

ఇకపోతే వెంకటేష్ 'రానా నాయుడు' అనే వెబ్ సిరీస్ తో ఓటీటీ వరల్డ్ లో ఎంట్రీ ఇస్తున్నారు. ఓటీటీ దిగ్గజం నెట్ ఫ్లిక్స్ కోసం చేస్తున్న ఈ సిరీస్ లో తన అన్న కొడుకు రానా దగ్గుబాటితో కలసి నటిస్తున్నారు. ఇది 'రే డోనోవన్' అనే అమెరికన్ క్రైమ్ డ్రామాకు రీమేక్ గా రూపొందుతోంది. ఇప్పటికే విడుదలైన ఫస్ట్ లుక్ మరియు టీజర్ ఆకట్టుకున్నాయి. 'మీర్జాపూర్' ఫేమ్ కరణ్ అన్షుమన్ మరియు సుప్రన్ ఎస్ వర్మ ఈ సిరీస్ కు దర్శకత్వం వహించారు. నెట్ ఫ్లిక్స్ త్వరలోనే ఈ సిరీస్ స్ట్రీమింగ్ డేట్ ప్రకటించనుంది.



నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.