వరుసగా మూడవ వారం బాక్సాఫీస్ సందడి కరువు

కరోనా ముందు ప్రతి వారం రెండు మూడు సినిమాలు ప్రేక్షకుల ముందుకు వచ్చేవి. అందులో కనీసం ఏదో ఒకటి అయినా పాజిటివ్ రెస్పాన్స్ దక్కించుకుంటే మోస్తరు వసూళ్లు దక్కేవి. కాని కరోనా వల్ల సినిమాల పరిస్థితి మారింది. జనాలు సినిమాలకు సక్సెస్ టాక్ వస్తేనే థియేటర్లకు వెళ్లి చూసేందుకు ఆసక్తి చూపిస్తున్నారు. మౌత్ టాక్ తో పాటు సోషల్‌ మీడియా రివ్యూలను చూసి సినిమాలకు వెళ్తున్న వారు ఉన్నారు.

ఈ సమయంలో రిస్క్ తీసుకుని చిన్న సినిమా లకు యావరేజ్ సినిమాలకు ఏముంది వెళ్లడం అనుకుంటున్నారు. పెద్ద సినిమాలు అయినా పాజిటివ్‌ రెస్పాన్స్ దక్కించుకోకుంటే వెళ్లే పరిస్థితి లేదు. అలా గత మూడు వారాలుగా టాలీవుడ్ బాక్సాఫీస్ వద్ద సందడి కరువయ్యింది.

దసరా సీజన్ తర్వాత మళ్లీ బాక్సాఫీస్ వద్ద హడావుడి లేదు. దీపావళికి వచ్చిన సినిమా ల్లో ఏ ఒక్కటి కూడా ఆకట్టుకోలేక పోయింది. దాంతో జనాలు దీపావళి సినిమాలను థియేటర్లలో చూసేందుకు ఆసక్తి చూపించకుండా లైట్ తీసుకున్నారు. ఆ తర్వాత వారంలో అంటే గత వారంలో పుష్పక విమానం సినిమా వచ్చింది. ఆ సినిమాకు గొప్పగా ఉందన్న టాక్ రాలేదు. దాంతో జనాలు ఆ సినిమాలను కూడా లైట్ తీసుకున్నారు.

రాజా విక్రమార్క సినిమా కూడా జనాలను ఆకట్టుకోవడంలో విఫలం అవ్వడంతో గత వారం థియేటర్ల వద్ద జనాలు కనిపించలేదు. ఇక ఈ వారంలో సినిమాలు పెద్దగా విడుదలే లేవు. నేడు ప్రేక్షకుల ముందుకు రెండు చిన్న సినిమాలు వచ్చాయి. అవి కూడా పెద్దగా సందడి చేస్తాయన్న నమ్మకం లేదంటూ బాక్సాఫీస్ విశ్లేషకులు అభిప్రాయం వ్యక్తం చేస్తున్నారు.

వరుసగా మూడు నాలుగు వారాలుగా సరైన సినిమాలే రాకపోవడంతో థియేటర్ల యాజమాన్యాలు జుట్టు పీక్కోవాల్సిన పరిస్థితి. సినిమాలను తీసుకోవాల్సిందే.. వాటికి జనాలు రాకపోవడం వల్ల మెయింటెన్స్ కూడా రాకపోవడంతో నష్టపోవాల్సి వస్తుంది అంటూ ఆవేదన వ్యక్తం చేస్తున్నారు.

ఈ పరిస్థితులు ఇంకా ఎన్ని రోజులో అంటూ వారు ఆవేదన చెందుతున్నారు. వచ్చే వారంలో కూడా గొప్ప సినిమా లు ఏమీ లేవు. కనుక వరుసగా నాల్గవ వారం కూడా బాక్సాఫీస్‌ వద్ద సందడి కనిపించక పోవచ్చు అంటున్నారు. డిసెంబర్‌ మొదలు అయితే పరిస్థితి ఏమైనా మారుతుందేమో చూడాలి. ఒకేసారి రెండు మూడు పెద్ద సినిమాలు వచ్చేయాలని పోటీ పడే బదులు ఈ సమయంలో తమ సినిమాలను విడుదల చేసి ఉంటే బాగుండేది అంటూ కొందరు అభిప్రాయం వ్యక్తం చేస్తున్నారు.