అలరిస్తున్న '101 జిల్లాల అందగాడు' టైటిల్ సాంగ్..!

అవసరాల శ్రీనివాస్‌ - 'చి.ల‌.సౌ' ఫేమ్‌ రుహ‌నీ శ‌ర్మ హీరోహీరోయిన్లుగా నటిస్తున్న తాజా చిత్రం ''101 జిల్లాల అందగాడు''. రాచకొండ విద్యాసాగర్ దర్శకత్వం వహిస్తున్న ఈ చిత్రానికి అవసరాల శ్రీనివాస్‌ స్టోరీ కూడా అందించారు. దిల్ రాజు - క్రిష్ జాగర్లమూడి సమర్పణలో శ్రీవెంక‌టేశ్వ‌ర క్రియేష‌న్స్‌ - ఫ‌స్ట్ ఫ్రేమ్ ఎంట‌ర్‌టైన్‌మెంట్స్ బ్యానర్స్ పై శిరీష్ - వై.రాజీవ్ రెడ్డి - జె.సాయిబాబు ఈ సినిమాని నిర్మిస్తున్నారు. గొత్తి సూర్య నారాయణ అనే పాత్రలో నటిస్తున్న అవసరాల ఫస్ట్ లుక్ ను బట్టతలతో చూపించి సినిమాపై ఆసక్తిని కలిగించారు. ఈ క్రమంలో తాజాగా 'నూటొక్క జిల్లాల అందగాడు' అనే సాంగ్ లిరికల్ వీడియోని రిలీజ్ చేశారు.

'కోటగుమ్మం సెంటర్ లో కోటిగాడు అతగాడు.. సత్తిపూడి జంక్షన్ లో సత్తిబాబు అతగాడు' అంటూ సాగిన ఈ పాటకు శక్తికాంత్‌ కార్తీక్‌ ట్యూన్ సమకూర్చారు. ఇందులో హీరో పాత్ర స్వభావాన్ని తెలియజేసేలా లిరిసిస్ట్ భాస్కరభట్ల సాహిత్యం అందించారు. సింగర్ సింహా తనదైన శైలిలో ఎనర్జిటిక్ గా ఆలపించిన ఈ 'నూటొక్క జిల్లాల అందగాడు..' సాంగ్ శ్రోతలను ఆకట్టుకుంటోంది. త్వరలోనే సినిమాకు సంబంధించిన టీజర్ ని రిలీజ్ చేయనున్నారు. ప్రస్తుతం పోస్ట్ ప్రొడక్షన్ వర్క్స్ జరుపుకుంటున్న ఈ కామెడీ ఎంటర్టైనర్ ని సమ్మర్ కానుకగా మే 7న విడుదల చేయడానికి సన్నాహాలు చేస్తున్నారు.