ద‌ర్శ‌కురాలిగా మారిన నోరా ఫ‌తేహి

బాహుబ‌లి చిత్రంలో `మ‌నోహ‌రి..` సాంగ్ తో తెలుగు యువ‌త హృద‌యాల్ని గెలుచుకుంది నోరా ఫ‌తేహి. ఈ మొరాక‌న్ కెన‌డియ‌న్ బ్యూటీ ఇండియాలో డ్యాన్సింగ్ క్వీన్ గా దుమ్ము దులిపేస్తోంది. ఇప్ప‌టికే ఇండియా బెస్ట్ డ్యాన్స‌ర్ గా నోరా పేరు మార్మోగుతోంది. ఓవైపు హిందీ డ్యాన్స్ రియాలిటీ షోల‌కు జ‌డ్జిగా కొన‌సాగుతూనే స్పెష‌ల్ నంబ‌ర్ల‌తో దేశీ ప‌రిశ్ర‌మ‌ను అల్లాడిస్తోంది. భారీ పాన్ ఇండియా చిత్రాల్లో ఛాలెంజింగ్ యాక్ష‌న్ రోల్స్ తోనూ మునుముందు ధ‌డ పుట్టించేందుకు రెడీ అవుతోంది.

ఇంత‌లోనే నోరా ద‌ర్శ‌కురాలిగా మారింది. నోరా ఫతేహి స్వ‌యంగా న‌టించి నిర్మించిన `డర్టీ లిటిల్ సీక్రెట్` పాట వెబ్ లో నెమ్మ‌దిగా ఊపందుకుంటోంది. ఈ పాట‌తో నోరా దర్శక‌నిర్మాత‌గా స‌త్తా చాటింద‌ని ప్ర‌శంస‌లు కురుస్తున్నాయి. గాయనిగా నిర్మాతగా నోరా ఫతేహికి ఇది మూడవ అంతర్జాతీయ పాట. ఇటీవ‌లే `డర్టీ లిటిల్ సీక్రెట్ సాంగ్ రిలీజై టాప్ చార్ట్ బస్టర్ డ్యాన్స్ గీతాల్లో ఒకటిగా నిలిచింది. UK కళాకారుడు జాక్ నైట్ ఇందులో నోరాతో పాటు స్టెప్పు క‌లిపాడు. ఈ అప్-టెంపో ట్రాక్ రోజురోజుకు ఊపందుకుంటోంది. ఈ వీడియోలో నోరా ఫ‌తేహి అద్భుత‌ నర్తకిగా త‌న‌ను తాను ఎలివేట్ చేసుకున్న తీరు ఆక‌ట్టుకుంటోంది. అంతేకాదు.. దర్శకురాలిగా కూడా ఆమె అరంగేట్రం అద‌ర‌గొట్టింద‌న్న టాక్ వినిపిస్తోంది.

`డర్టీ లిటిల్ సీక్రెట్` అనేది ఆధునిక కళాత్మక త‌ను మేళ‌వించి అంతర్జాతీయ భావాలను ప్రతిబింబించే ఒక అప్ బీట్ సాంగ్. బహుముఖ ప్రతిభావంతులైన నోరా ఫతేహి దర్శకురాలిగానే కాదు చాలా విభాగాల్లో తానేంటో చూపించింది. ప్రపంచంలో అత్యధికంగా అనుసరిస్తున్న డ్యాన్స్ ఐకాన్ గా నోరా వెలిగిపోవ‌డానికి త‌న ప్ర‌తిభ కార‌ణమ‌ని మ‌రోసారి ఈ పాట‌తో నిరూప‌ణ అయ్యిందంటూ పొగిడేస్తున్నారు. సాంగ్ కి దర్శకురాలిగా నోరా ప్రపంచ పాప్-సంస్కృతి ప్రభావంతో ప్రేరణ పొందిందని ఈ ట్రాక్ వెల్ల‌డిస్తోంది.

అత్యాధునిక విజువల్స్.. మ‌తి చెడే కాస్ట్యూమ్ సెన్స్.. గ్రౌండ్ బ్రేకింగ్ సౌండ్ సిస్టం...సింబాలిజం షాట్ ల‌తో అద్భుతమైన కొరియోగ్రఫీ తో పాట ఆక‌ట్టుకుంది. ట్రాక్ లోని ప్రతి ఫ్రేమ్ లో కొన్ని విభిన్నమైన తప్పుపట్టలేని స్టైలిష్ అంశాలు యువ‌త‌రాన్ని మెప్పిస్తున్నాయి. ఎంపిక చేసుకున్న డ్యాన్స్ మూవ్స్.. ఫ్యాషన్ ట్రెండ్స్ ప్ర‌తిదీ వినోద వ్యాపారాన్ని రీడిఫైన్ చేసేలా ఉంద‌ని గేమ్-ఛేంజర్ గా ఉంద‌ని కూడా పొగ‌డ్త‌లు కురుస్తున్నాయి. డర్టీ లిటిల్ సీక్రెట్ తో నోరా బ‌హుముఖ ప్ర‌జ్ఞావంతురాలిగా నిరూపించింది.

నోరా ఫతేహి తాజా ఇంట‌ర్వ్యూలో తన దర్శకత్వ అనుభ‌వం గురించి మాట్లాడుతూ.. ``ఒక కళాకారిణిగా నేను ఎప్పుడూ ఎక్కువ జోష్ తో ప‌ని చేయాల‌ని ఆకలితో ఉంటాను. నేను డర్టీ లిటిల్ సీక్రెట్ కి పని చేస్తున్నప్పుడు కొరియోగ్ర‌ఫీ ప‌రంగా స్క్రీన్ ప్లేని అర్థం చేసుకోవడానికి డీకోడ్ చేయాల్సిన అంశాల‌తో వీడియోను రూపొందించాలనుకున్నాను. పాట‌ చిత్రీక‌ర‌ణ‌కు ముందే నా మనస్సులో ట్రాక్ ను ఊహించగలిగాను. నేను సింబాలిజం ద్వారా ఏం చెప్పాలనుకుంటున్నానో నాకు తెలుసు. నేను ఆ కోణంలో ప‌ని చేసాను. ఎంచుకున్న ప్రతి సెటప్.. ప్రతి కాస్ట్యూమ్ స‌హా ప్రతి క్షణం వీడియోలో క‌నిపించే ప్రతిదానికీ ఒక అర్థం ఉంటుంది. దానిని నేను జాగ్రత్తగా డీకోడ్ చేయాలి. ఇది ఖచ్చితంగా ద‌ర్శ‌కురాలిగా నాకు కూడా ఒక‌ సవాల్ లాంటిది. కానీ అది ఎలా తెర‌పై మ‌ల‌చ‌గ‌లిగానో చూడడానికి చాలా సంతోషం అనిపించింది. ఇప్పుడు ఈ పాట చార్ట్ బ‌స్ట‌ర్ గా నిలిచి అభిమానుల నుంచి అందుకున్న అపారమైన ప్రేమ నా క‌ష్టాన్ని మ‌రిపిస్తోంది`` అంటూ నోరా ఎమోష‌న‌ల్ అయ్యింది.

వృత్తిపరంగా నోరా ఫతేహి బుల్లితెరపై బిజీగా ఉంది. ప్రస్తుతం పాపుల‌ర్ హిందీ చానెల్లో `డ్యాన్స్ దీవానే జూనియర్స్` న్యాయమూర్తుల ప్యానెల్ లో జ‌డ్జిగా కొన‌సాగుతోంది. డ్యాన్స్ దీవానే జూనియర్స్ అనేది కొత్త డ్యాన్స్ రియాలిటీ షో.. ఇది ప్రారంభించిన కొద్ది రోజుల్లోనే బాగా ప్రాచుర్యం పొందింది. ఇది పిల్లల డ్యాన్స్ రియాలిటీ షో.. ప్రతిభావంతులైన పిల్లల నృత్య నైపుణ్యాలను ప్రదర్శించడానికి విజేతకు ట్రోఫీని అందించేదుకు ఏర్పాటు చేసిన‌ భారీ వేదిక.. ఈ షోకు నోరా ప్రముఖ నటి నీతూ కపూర్ కొరియోగ్రాఫర్ మార్జి పెస్టోంజీ న్యాయనిర్ణేతలుగా వ్యవహరిస్తున్నారు. కంటెస్టెంట్స్ ని జడ్జి చేయడమే కాకుండా సెట్స్ లో చాలా సరదాగా గడుపుతున్నారు. నోరా రాక‌తో వేదిక గ్లామ‌ర‌స్ గా మారిపోతోంది. నోరా ప‌లు భారీ చిత్రాల్లోనూ కీల‌క పాత్ర‌లు పోషిస్తూ బిజీగా ఉంది.