బింబిసారుడి కోసం రావణ్ వస్తున్నాడు..!

నందమూరి కల్యాణ్ రామ్ హీరోగా తెరకెక్కిన లేటెస్ట్ సోషియో ఫాంటసీ యాక్షన్ మూవీ ''బింబిసార''. 'ఏ టైమ్ ట్రావెల్ ఫ్రమ్ ఈవిల్ టు గుడ్' అనేది దీనికి ట్యాగ్ లైన్. ఎన్టీఆర్ ఆర్ట్స్ బ్యానర్ లో రూపొందే ఈ సినిమాతో మల్లిడి వశిష్ఠ్ అనే నూతన దర్శకుడు ఇండస్ట్రీకి పరిచయం అవుతున్నాడు. రిలీజ్ కు రెడీ అయిన ఈ చిత్రానికి సంబంధించిన ప్రమోషన్స్ జోరుగా సాగుతున్నాయి.

ఇందులో భాగంగా 'బింబిసార' ప్రీ రిలీజ్ ఈవెంట్ ను నిర్వహించడానికి మేకర్స్ ప్లాన్ చేశారు. హైదరాబాద్ లోని శిల్పకళా వేదికలో జులై 29వ తేదీ సాయంత్రం గ్రాండ్ గా ఈ వేడుకను నిర్వహించనున్నారు. అయితే ఈ ఈవెంట్ కు యంగ్ టైగర్ ఎన్టీఆర్ చీఫ్ గెస్టుగా హాజరుకాబోతున్నారు.

ఈ విషయాన్ని అధికారికంగా వెల్లడించిన టీమ్.. 'వస్తున్నాడు' అంటూ ఓ వీడియోని రిలీజ్ చేసింది. బింబిసారుడు కోసం 'జై లవకుశ' సినిమాలో ఎన్టీఆర్ పోషించిన రావణ్ వస్తున్నట్లు కట్ చేయబడిన ఈ వీడియో ఫ్యాన్స్ ని విశేషంగా ఆకట్టుకుంటోంది.

నందమూరి బ్రదర్స్ కళ్యాణ్ రామ్ - ఎన్టీఆర్ మధ్య అనుబంధం గురించి ప్రత్యేకంగా చెప్పాల్సిన అవసరం లేదు. ఎల్లప్పుడూ ఒకరికొకరు తోడుగా నిలుస్తూ ఉంటారు. గతంలోనూ సోదరుడి సినిమా ఫంక్షన్స్ కు తారక్ అతిథిగా వచ్చాడు. ఇప్పుడు 'బింబిసార' సినిమా కోసం తనవంతు సపోర్ట్ చేయడానికి రెడీ అయ్యారు.

'బింబిసార' అనేది ఒక టైం ట్రావెల్ మూవీ. కళ్యాణ్ రామ్ కెరీర్లో అత్యంత భారీ బడ్జెట్ తో తెరకెక్కించిన చిత్రం. ఇందులో అతను ద్విపాత్రాభినయం చేశారు. చారిత్రక యుగంలో క్రూరమైన బార్బెరియన్ కింగ్ బింబిసారుడిగా.. సమాజం కోసం పోరాడే ఆధునిక యువకుడిగా రెండు పాత్రల్లో కళ్యాణ్ రామ్ కనిపించనున్నారు. ఇప్పటి వరకు వచ్చిన ఫస్ట్ లుక్ - టీజర్ మరియు టీజర్ మంచి రెస్పాన్స్ తెచ్చుకున్నాయి.

కళ్యాణ్ రామ్ సరసన కేథరిన్ థ్రెసా - సంయుక్త మీనన్ మరియు వారీనా హుస్సేన్ హీరోయిన్లుగా నటించారు. వెన్నెల కిషోర్ - బ్రహ్మాజీ - శ్రీనివాస రెడ్డి ఇతర ప్రధాన పాత్రలు పోషించారు. చిరంతన్ భట్ ఈ సినిమాకు సంగీతం సమకూర్చగా.. ఎంఎం కీరవాణి బ్యాక్ గ్రౌండ్ స్కోర్ కంపోజ్ చేశారు. ఛోటా కె నాయుడు సినిమాటోగ్రఫీ నిర్వహించారు.

'బింబిసార' చిత్రాన్ని కళ్యాణ్ రామ్ సమర్పణలో హరికృష్ణ నిర్మించారు. 2022 ఆగస్ట్ 5న ప్రపంచ వ్యాప్తంగా భారీ స్థాయిలో విడుదల చేయనున్నారు. ఇందులో భాగంగా సినిమాకు మరింత బజ్ తీసుకురావడానికి ఎన్టీఆర్ ను ప్రీ రిలీజ్ ఈవెంట్ కు ముఖ్య అతిథిగా తీసుకొస్తున్నారు. చాలా రోజుల తర్వాత నందమూరి అన్నదమ్ములను ఒకే వేదిక మీద చూసే ఛాన్స్ వస్తుందటంతో ఫ్యాన్స్ ఖుషీ అవుతున్నారు.

నిజానికి ఎన్టీఆర్ - కళ్యాణ్ రామ్ కలిసి ఓ సినిమా చేస్తే చూడాలని నందమూరి అభిమానులు ఎంతో ఆసక్తిగా ఎదురుచూస్తున్నారు. అయితే ఇప్పుడు 'బింబిసార' సినిమా సక్సెస్ అయితే సీక్వెల్ లో అన్నదమ్ములు ఇద్దరూ స్క్రీన్ షేర్ చేసుకునే అవకాశం ఉంది. ఈ విషయం మీద కళ్యాణ్ రామ్ ఇప్పటికే క్లారిటీ ఇచ్చారు. అలానే ఎన్టీఆర్ నుంచి రాబోయే రెండు సినిమాల నిర్మాణంలో తన అన్న కూడా భాగం పంచుకోనున్న సంగతి తెలిసిందే.