ఎన్టీఆర్ క్రేజ్ అదీ మరి

గత మూణ్నాలుగేళ్లలో జూనియర్ ఎన్టీఆర్ ఎలా ఎదిగాడో.. తన ఫాలోయింగ్ ను ఎలా పెంచుకున్నాడో చూస్తూనే ఉన్నాం. ట్రెండుకు తగ్గ సినిమాలు చేస్తూ.. వరుస హిట్లతో దూసుకెళ్లిన యంగ్ టైగర్.. ఆ తర్వాత బుల్లితెర మీదా దృష్టిపెట్టాడు. ‘బిగ్ బాస్’ షోకు హోస్ట్ గా వ్యవహరించడం ద్వారా కుటుంబ ప్రేక్షకుల్ని అమితంగా ఆకట్టుకున్నాడు. ఈ షో మొదలుకావడానికి ముందు ఎన్నో సందేహలుండగా.. వాటన్నింటినీ పటాపంచలు చేస్తూ తనదైన నైపుణ్యాలతో ఆ షోను రక్తి కట్టించాడు. గత ఏడాది ‘బిగ్ బాస్’కు ఎంత మంచి టీఆర్పీ రేటింగ్స్ వచ్చాయో తెలిసిందే. తాజాగా ఎన్టీఆర్ ఈటీవీలో ప్రసారమయ్యే టాప్ డ్యాన్సింగ్ షో ‘ఢీ’ పదో సీజన్ ఫైనల్స్ కు ఎన్టీఆర్ జడ్జిగా హాజరైన సంగతి తెలిసిందే. ఎన్టీఆర్ పాల్గొన్న రెండు ఎపిసోడ్లకూ తిరుగులేని ఆదరణ లభించిందని.. టీఆర్పీ రేటింగ్స్ చూస్తే అర్థమవుతోంది.

ఎన్టీఆర్ ఎపిసోడ్లు రెంటికీ కలిపి సగటున 13.9 టీఆర్పీ రేటింగ్ రావడం విశేషం. ‘ఢీ’ చరిత్రలోనే ఇది హైయెస్ట్ రేటింగ్ అట. అంచనాలకు తగ్గట్లే ఈ ఫైనల్స్ ఓ రేంజిలో నడిచాయి. పార్టిసిపెంట్లు అద్భుతమైన నృత్య నైపుణ్యాలతో విస్మయపరిచారు. ఎన్టీఆర్ సైతం స్వింగ్ జరా పాటకు డ్యాన్స్ చేసి అభిమానుల్ని అలరించాడు. అంతే కాక జడ్జింగ్ విషయంలోనూ తన ప్రత్యేకతను చాటుకున్నాడు. షో ఆద్యంతం ఎన్టీఆర్ ఆకట్టుకున్నాడు. ఈ ఎపిసోడ్‌ మొత్తాన్ని యూట్యూబ్‌ లో పెడితే ఇప్పటికే 10 లక్షలకు పైగా వ్యూస్ రావడం విశేషం. ఓవైపు సినిమాల్లో నటిస్తూనే మధ్య మధ్యలో కమర్షియల్స్ చేస్తూ.. ఇలా టీవీ షోల్లో పాల్గొంటూ అన్ని రకాలుగా తన రేంజ్ పెంచుకునే ప్రయత్నం చేస్తున్నాడు తారక్. మిగతా టాలీవుడ్ హీరోలతో మంచి సంబంధాలు కూడా నెరుపుతూ అందరివాడిగా పేరు తెచ్చుకుంటున్నాడతను.