ఫోటో జ‌ర్న‌లిస్టును తార‌క్ అలా అన్నారా?

నిరంత‌ర షెడ్యూళ్ల‌తో నానా తంటాలు ప‌డుతుంటారు సినీజ‌ర్న‌లిస్టులు.. ఫోటోగ్రాఫ‌ర్లు. హైద‌రాబాద్ స‌హా ప‌లు న‌గ‌రాల్లో సెల‌బ్రిటీ వేడుక‌ల్ని క‌వ‌ర్ చేసేందుకు ఉరుకులు ప‌రుగులు పెడుతుంటారు. సెల‌బ్రిటీల రాక కోసం మాటు వేసి తిండి తిప్ప‌లు లేకుండా ఎదురు చూడాల్సిన ప‌రిస్థితి ఉంటుంది. అదంతా వృత్తిలో భాగం. ఒక్కోసారి తిన‌డానికి తిండి.. నిదురించ‌డానికి టైమ్ దొరక్క ఆరోగ్య‌ప‌రంగా చిక్కులు త‌ప్ప‌వు.

అయితే ఇదంతా తెలిసిన వాడిగా తార‌క్ ఓ ఫోటోగ్రాఫ‌ర్ పై అదిరిపోయే పంచ్ లే వేశారు. అయితే అదంతా స‌ర‌దా సంభాష‌ణ మాత్ర‌మే. అస‌లింత‌కీ తార‌క్ ఏమ‌న్నారు? అన్న‌ది చూస్తే.. హైదరాబాద్ అంతర్జాతీయ విమానాశ్రయంలో జూనియర్ ఎన్టీఆర్ ఓ స్టిల్‌ ఫోటోగ్రాఫర్ పై ప్ర‌శ్న‌ల వ‌ర్షం కురిపించారు. త‌న‌పై ఫ్లాష్ లు మెరిపించిన వెంట‌నే ఆ ఫోటోగ్రాఫ‌ర్ ని పిలిచిన తార‌క్ ``నువ్వు ఇంక ఇంటికి వెల్లవా? తిండి నిద్రా అన్నీ ఇక్కాడేనా?`` అని ప్ర‌శ్నించారు. అదంతా అత‌డు స‌ర‌దాగా అడిగిన‌ది. ఇలా ప్ర‌తిసారీ జ‌ర్న‌లిస్టుల‌తో క‌లిసి పోవ‌డం త‌న‌కే చెల్లింది.

సాటి హీరోలు బావుండాల‌ని.. ప్ర‌జ‌లు.. అభిమానులు బావుండాల‌ని కోరుకునే స్వ‌భావం తార‌క్ ది. అందుకే అత‌డు అంద‌రివాడు అయ్యాడు. ప్ర‌పంచ‌వ్యాప్తంగా అశేష అభిమానుల్ని సంపాదించుకున్నాడు. ఇక జ‌ర్న‌లిస్టుల్లోనూ అత‌డంటే అభిమానించే వారు ఎక్కువే. ఫోటోజ‌ర్న‌లిస్టులు అత‌డితో స‌న్నిహితంగా ఉంటారు. తార‌క్ ప్ర‌స్తుతం ఆర్.ఆర్.ఆర్ చిత్రీక‌ర‌ణ‌లో బిజీగా ఉన్న సంగ‌తి తెలిసిందే.