10.5 లక్షల నెంబరు తారక్ కారు మీదకొచ్చింది

కోరుకున్నది సొంతం చేసుకోవటం కొందరికి అలవాటు. మనసుకు నచ్చిన నెంబరును సొంతం చేసుకోవటం కోసం రికార్డుస్థాయిలో రూ.10.5లక్షలు పెట్టి తన కొత్త కారు నెంబరును జూనియర్ ఎన్టీఆర్ సొంతం చేసుకోవటం తెలిసిందే. ఆన్ లైన్ వేలంలో లక్షలు పెట్టి కొనుగోలు చేసిన ‘‘9999’’నెంబరును అధికారికంగా ఈ రోజు తన కారు మీద వేయించుకున్నారు జూనియర్.

ఇందుకోసం ఖైరతాబాద్ ఆర్టీఏ కార్యాలయానికి వచ్చిన జూనియర్.. తన కొత్త బీఎండబ్ల్యూ కారును ఈ రోజు రిజిష్టర్ చేసుకున్నారు. అధికారికంగా చేపట్టాల్సిన కార్యక్రమాలు పూర్తి కావటంతో జూనియర్ ఎన్టీఆర్ కొనుగోలు చేసిన కొత్త కారు మీద లక్షలాది రూపాయిలు పెట్టి సొంతం చేసుకున్న ‘‘TS09 EL9999’’ కారు మీదకు ఠీవీగా వచ్చి చేరినట్లైంది. మరోవైపు అక్కినేని నాగార్జున కుమారుడు అఖిల్ సైతం ఈ మధ్యనే కొత్త కారు కొనుగోలు చేశారు. దీనికి సంబంధించిన రిజిస్ట్రేషన్ కోసం ఖైరతాబాద్ కార్యాలయానికి వచ్చారు.

ఒకేరోజు ఇద్దరు ప్రముఖ తారలు ఖైరతాబాద్ ఆర్టీఏ కార్యాలయానికి రావటంతో రిజిస్ట్రేషన్లు.. ఇతర పనుల కోసం వచ్చిన వారు.. తాత్కాలికంగా తాము వచ్చిన పనుల్ని వదిలేసి.. ఈ ఇద్దరు హీరోల్ని చూసేందుకు.. ఫోటోలు.. ఆటోగ్రాఫ్ లు తీసుకునేందుకు పోటీ పడ్డారు. ఇద్దరు సెలబ్రిటీలు తమ ఆఫీసుకు వచ్చినందుకు ఆర్టీఏ అధికారుల సైతం హ్యాపీగా స్వాగతం పలికి.. వారి పనుల్ని పూర్తి చేసి పంపారు.