బాలీవుడ్ డైరెక్టర్.. జూ.ఎన్టీఆర్.. ఐటెం

జూనియర్ ఎన్టీఆర్ ఇప్పుడు టాప్ ఫాంలో ఉన్న సంగతి తెలిసిందే. సినిమాలతో వరుసగా హిట్స్ కొట్టేస్తున్నాడు. కొన్నేళ్లపాటు సక్సెస్ కోసం ఎదురుచూడాల్సి వచ్చిన పరిస్థితి తర్వాత.. టెంపర్ తో బౌన్స్ బ్యాక్ అయిన ఎన్టీఆర్.. నాన్నకు ప్రేమతో.. జనతా గ్యారేజ్ చిత్రాలతో సూపర్ హిట్.. బ్లాక్ బస్టర్ కూడా తన ఖాతాలో వేసుకున్నాడు. అయితే.. అవన్నీ బడా డైరెక్టర్ల చిత్రాలు కావడంతో.. క్రెడిట్ లో కొంత భాగం వాళ్ల ఖాతాలో కూడా పడింది. కానీ ఇప్పుడు జై లవ కుశ అంటూ బాబీ లాంటి సాధారణ దర్శకుడితో చేస్తున్న సినిమాతో బ్లాక్ బస్టర్ కొట్టే సాహసాన్ని భుజాన వేసుకున్నాడు ఎన్టీఆర్.

తన సినిమాలను సక్సెస్ చేసుకునేందుకు యంగ్ టైగర్ ప్లాన్స్ కూడా భలేగా ఉంటున్నాయి. బాలీవుడ్ దర్శకుడు కరణ్ జోహార్ టైపులోనే ఎన్టీఆర్ యాక్టివిటీస్ ఉండడం విశేషం. బ్రదర్స్.. అగ్నిపథ్ వంటి చిత్రాలలో టాప్ రేంజ్ లో ఉన్న కరీనా కపూర్.. కత్రినా కైఫ్ లతో ఐటెం సాంగ్స్ చేయించి ఆయా సినిమాలకు ముందుగా భలే క్రేజ్ తీసుకొచ్చేశాడు. ఇప్పుడు ఎన్టీఆర్ కూడా తన సినిమాలలో టాప్ హీరోయిన్స్ తో ఐటెం సాంగ్ చేయిస్తుండడం విశేషం. జనతా గ్యారేజ్ లో టాలీవుడ్ చందమామ కాజల్ అగర్వాల్ తో ఐటెం సాంగ్ చేయించిన జూనియర్.. ఇప్పుడు జై లవ కుశ మూవీలో మిల్కీ బ్యూటీ తమన్నాతో కూడా ఐటెం సాంగ్ లో చిందులు వేయనున్నాడు.

రెండు ఐటెంసాంగ్స్ కే కరణ్ జోహార్- ఎన్టీఆర్ ను పోల్చడం ఎలా అనుకోవచ్చేమో.. బుల్లితెరపై కూడా తాము హోస్ట్ చేస్తున్న కార్యక్రమాలతో టీవీ ఆడియన్స్ ను మెప్పించడంలో కూడా వీళ్లు టాప్ ఫాంలో ఉన్న విషయం గుర్తుంచుకోవాలి కదా!