‘జై లవకుశ’లో రెండోవాడు ఎప్పుడంటే..

‘జై లవకుశ’లో జూనియర్ ఎన్టీఆర్ త్రిపాత్రాభినయం చేస్తున్న సంగతి తెలిసిందే. అందులో ఒక పాత్రకు సంబంధించిన ఫస్ట్ పోస్టర్లతో పాటు టీజర్ కూడా ఆల్రెడీ రిలీజయ్యాయి. పోస్టర్లోనే కాక ‘జై’ పాత్రలో ఎన్టీఆర్ చితగ్గొట్టేశాడు. ఆ హావభావాలు.. ఆ డైలాగ్ డెలివరీ నందమూరి అభిమానుల్నే కాక సామాన్య ప్రేక్షకులనూ మెప్పించాయి. ఇప్పుడిక రెండో పాత్ర ‘లవ’కు సంబంధించిన విశేషం త్వరలోనే అభిమానుల్ని పలకరించబోతోంది.

ఈ నెల 7వ తేదీన లవకుమార్ పాత్రకు సంబంధించిన ఫస్ట్ లుక్ పోస్టర్ రిలీజ్ కానుంది. ఆ తర్వాత కొన్ని రోజులకే ‘లవ’ టీజర్ కూడా వస్తుంది. ఇంకా ఈ సినిమాలో కుశ్ కుమార్ పాత్ర కూడా ఉంది. ఆగస్టు నెల పూర్తయ్యేసరికి పోస్టర్లు.. టీజర్ల ద్వారా మిగతా రెండు పాత్రల పరిచయం పూర్తయిపోతుందన్నమాట. నెలాఖర్లోనే ‘జై లవకుశ’ ఆడియో విడుదల అనుకుంటున్నారు. ఆ రోజే థియేట్రికల్ ట్రైలర్ కూడా వస్తుంది.

అంతా అనుకున్న ప్రకారం జరిగితే ముందు ప్రకటించినట్లే సెప్టెంబరు 21న ‘జై లవకుశ’ ప్రేక్షకుల ముందుకొచ్చే అవకాశముంది. బాలయ్య సినిమా ‘పైసా వసూల్’ సెప్టెంబరు మొదటి వారంలోనే వచ్చేస్తుండటంతో బాబాయితో అబ్బాయి క్లాష్ గురించి బెంగ అక్కర్లేదు. దసరా సెలవుల ముంగిట సినిమాను ఏ ఇబ్బందీ లేకుండా విడుదల చేసుకోవచ్చు. ‘జై లవకుశ’ వచ్చిన ఆరు రోజులకే మహేష్ మూవీ ‘స్పైడర్’ విడుదల కానున్న సంగతి తెలిసిందే.