ఎన్టీఆర్ ధ‌మాకా-1.. 6వ తేదీ 5.22 గంట‌ల‌కు

నంద‌మూరి అభిమానుల నిరీక్ష‌ణ‌కు ఇంకొన్ని రోజుల్లో తెర‌ప‌డ‌నుంది. జూనియ‌ర్ ఎన్టీఆర్ కొత్త సినిమా ‘జై ల‌వ‌కుశ’ టీజ‌ర్ విడుద‌ల‌పై ప్ర‌క‌ట‌న వ‌చ్చేసింది. ఈ నెల 6వ తేదీ (గురువారం) సాయంత్రం 5 గంట‌ల 22 నిమిషాల‌కు నేరుగా సోష‌ల్ మీడియాలో ‘జై ల‌వ‌కుశ’ టీజ‌ర్ లాంచ్ చేయ‌బోతున్నారు. విశేషం ఏంటంటే.. ‘జై ల‌వ‌కుశ‌’కు సంబంధించి విడుద‌ల చేయ‌బోయే టీజ‌ర్ ఇదొక్క‌టే కాదు. ఈ సినిమాకు ఏకంగా మూడు టీజ‌ర్లు వ‌ద‌ల‌బోతున్న‌ట్లుగా సంకేతాలిచ్చింది ఎన్టీఆర్ ఆర్ట్స్ సంస్థ‌.

‘జై ల‌వ‌కుశ‌’లో ఎన్టీఆర్ త్రిపాత్రాభిన‌యం చేస్తున్న సంగ‌తి తెలిసిందే. ఇందులో మూడు పాత్ర‌ల‌కు మూడు ప్ర‌త్యేక టీజ‌ర్లు రిలీజ్ చేయాల్సిన అవ‌స‌రం ఉంద‌ని.. 6వ తేదీన జై పాత్ర‌కు సంబంధించిన టీజ‌ర్ వ‌స్తుంద‌ని ప్ర‌క‌టించారు. అంటే దీని త‌ర్వాత మిగ‌తా రెండు క్యారెక్ట‌ర్ల‌కు సంబంధించిన‌ ఇంకో రెండు టీజ‌ర్లు కూడా త్వ‌ర‌లోనే ప్రేక్ష‌కుల్ని ప‌ల‌క‌రించ‌బోతున్నాయ‌న్న‌మాట‌. ఆ డేట్ల‌ను కూడా త్వ‌ర‌లోనే ప్ర‌క‌టించ‌నున్నారు.

‘జై ల‌వ‌కుశ’ టీజ‌ర్ ఇప్ప‌టికే ఆన్ లైన్లో లీక్ అయిన సంగ‌తి తెలిసిందే. ఐతే 6వ తేదీన రిలీజ్ చేయ‌బోయేది ఆ టీజ‌ర్ కాద‌ట‌. దాన్ని ప‌క్క‌న ప‌డేసి వేరే టీజ‌ర్ రెడీ చేసిన‌ట్లు స‌మాచారం. ఈ చిత్ర పీఆర్వో కూడా ఆ విష‌యాన్ని ధ్రువీక‌రించాడు. లీక్డ్ టీజ‌ర్ తో పోలిస్తే ఇది భిన్న‌మైంద‌ని.. సాలిడ్ గా ఉంటుంద‌ని అత‌ను ప్ర‌క‌టించాడు. మ‌రి ఆ టీజ‌ర్ ఎంత ప్ర‌త్యేకంగా ఉంటుందో.. నంద‌మూరి అభిమానుల్ని ఏమేర‌కు అల‌రిస్తుందో చూద్దాం.

Like Us on Facebook : https://www.facebook.com/Tupakidotcom/