ఎన్టీఆర్ అభిమానులకు విందు ఏప్రిల్లోనే..

టెంపర్ - నాన్నకు ప్రేమతో సినిమాలతో అభిమానులు తలెత్తుకుని తిరిగేలా చేశాడు యంగ్ టైగర్ ఎన్టీఆర్. ఈ రెండు సినిమాలకూ డిఫరెంట్ లుక్ తో దర్శనమిచ్చి ఆ సినిమాలపై ముందే ఓ హైప్ క్రియేటయ్యేలా చేశాడు తారక్. ఇలా లుక్ మార్చడంలో ఉండే మజా ఏంటో.. అది సినిమాకు ఎంత హెల్ప్ అవుతుందో ఎన్టీఆర్ కు బాగానే అర్థమైంది. తన తర్వాతి సినిమాకు కూడా ఇదే ఫార్ములా ఫాలో అయిపోతున్నాడు. కొరటాల శివ దర్శకత్వంలో తెరకెక్కుతున్న ‘జనతా గ్యారేజ్’కు కూడా ఎన్టీఆర్ లుక్ మార్చేస్తున్న సంగతి తెలిసిందే. ఎన్టీఆర్ చివరగా బయట కనిపించినపుడు కాస్త గడ్డం పెంచుకుని కనిపించాడు. అంతే తప్ప ‘జనతా గ్యారేజ్’లో ఎన్టీఆర్ లుక్ ఎలా ఉంటుందన్న క్లారిటీ జనాలకు లేదు.

ఐతే ఆ లుక్ ఏదో ఇంకో నెలన్నర రోజుల్లోనే బయటికి వచ్చేయబోతోంది. ఎందుకంటే ‘జనతా గ్యారేజ్’ ఫస్ట్ లుక్ పోస్టర్ రిలీజ్ కు ముహూర్తం ఫిక్స్ అయిపోయింది. ఏప్రిల్ 25న ఫస్ట్ పోస్టర్ బయటికి వస్తుందని సమాచారం. ఆగస్టు 12న ప్రేక్షకుల ముందుకు రాబోతున్న ఈ సినిమాపై ప్రారంభోత్సవం రోజునే మాంచి హైప్ నెలకొంది. ఇక ఓవైపు షూటింగ్ చేస్తూనే.. నెల రోజులకో సర్ ప్రైజ్ తో సినిమాను బాగా ప్రమోట్ చేయాలని భావిస్తున్నారు. అందులో భాగంగానే ఫస్ట్ లుక్ పోస్టర్ తో మొదలుపెట్టి.. ఆ తర్వాత ఫస్ట్ టీజర్.. సింగిల్ సాంగ్.. ఆడియో.. రిలీజ్ కార్యక్రమాలతో అభిమానుల్ని ఉర్రూతలూగించబోతున్నారు. ఈ మధ్యే ఎన్టీఆర్ షూటింగ్ స్పాట్ లో అడుగుపెట్టగా.. ప్రధాన తారాగణంపై కీలక సన్నివేశాలు చిత్రీకరిస్తున్నాడట కొరటాల.