సౌత్ ఇండియాలో వన్ అండ్ ఓన్లీ ఎన్టీఆర్

ఒకప్పుడు ఎన్టీఆర్ సినిమా వస్తుంటే.. అది ఆడుతుందా లేదా అని మాత్రమే చూసేవాళ్లు. ఏడాది కిందటి వరకు రికార్డుల గురించి మాట్లాడే పరిస్థితే లేదు. ఐతే సరైన సినిమాలు పడక ఎన్టీఆర్ అలా అయిపోయాడు కానీ.. కెరీర్ ఆరంభంలోనే ‘సింహాద్రి’ లాంటి ఇండస్ట్రీ హిట్ ఇచ్చిన ఎన్టీఆర్ స్టామినాను తక్కువ అంచనా వేయడానికి వీల్లేదు. రెండు వరుస సక్సెస్ లు అందుకునే సరికి ఎన్టీఆర్ అసలు సిసలు బాక్సాఫీస్ స్టామినా ఏంటో అందరికీ తెలిసొస్తోంది. మంచి టైమింగ్ లో రిలీజైన ఎన్టీఆర్ కొత్త సినిమా ‘జనతా గ్యారేజ్’ బాక్సాఫీస్ దగ్గర సంచలనాలు నమోదు చేస్తోంది. ‘బాహుబలి’ని పక్కనబెడితే.. తెలుగులో అత్యంత వేగంగా రూ.50 కోట్ల షేర్ మార్కును టచ్ చేసిన సినిమాగా రికార్డు సృష్టించిన ‘జనతా గ్యారేజ్’.. మరిన్ని రికార్డుల్ని ఖాతాలో వేసుకుంటోంది.

ఇప్పటికే వరుసగా మూడు సినిమాలతో నైజాంలో రూ.10 కోట్ల షేర్.. అమెరికాలో మిలియన్ క్లబ్.. కర్ణాటకలో రూ.5 కోట్ల షేర్ మార్కును అందుకున్న తొలి తెలుగు హీరోగా రికార్డు సృష్టించాడు తారక్. తాజాగా మరో సంచలన రికార్డును ఖాతాలో వేసుకున్నాడు. అమెరికాలో వరుసగా రెండు 1.5 మిలియన్ క్లబ్ సినిమాలు అందించిన హీరోగా అతను రికార్డు సృష్టించాడు. ‘జనతా గ్యారేజ్’ అక్కడ మంగళవారానికే 1.5 మిలియన్ క్లబ్బులోకి అడుగుపెట్టింది. మూడో రోజుకే మిలియన్ క్లబ్బులో అడుగుపెట్టిన ఆ సినిమా.. నాలుగో రోజైన ఆదివారం ఏకంగా 2 లక్షల డాలర్ల దాకా వసూలు చేసింది. సోమవారం కూడా లక్ష డాలర్లు వచ్చాయి. మంగళవారం 1.5 మిలియన్ క్లబ్బును టచ్ చేసిన ఈ సినిమా.. ఫుల్ రన్లో ఈజీగా 2 మిలియన్ మార్కును అందుకునేలా ఉంది.