బాలీవుడ్ దిగ్గజ నటుల మృతిపై ఎన్టీఆర్ ఎమోషనల్ ట్వీట్...!

బాలీవుడ్ లో వరుసగా విషాదాలు చోటు చేసుకుంటున్నాయి. భారతీయ చిత్ర పరిశ్రమలో అత్యంత ప్రజాదరణ పొందిన ఇద్దరు నటుల అకాల మరణంతో యావత్ సినీ అభిమానులు హృదయ విదారకంగా ఉన్నారు. నిన్న బాలీవుడ్ విలక్షణ నటుడు ఇర్ఫాన్ ఖాన్ మృతి చెందిన ఒక రోజు వ్యవధిలోనే మరో బాలీవుడ్ లెజెండరీ యాక్టర్ రిషి కపూర్ ఈ లోకాన్ని విడిచి పెట్టి వెళ్లిపోవడం అందరిని కలచివేస్తోంది. బాలీవుడ్ ప్రముఖులను ఈ వార్త జీర్ణించుకోలేని పరిస్థితిని తెచ్చింది. కేవలం బాలీవుడ్ ప్రముఖులే కాకుండా అన్ని సినీ పరిశ్రమల ప్రముఖులు వీరి మృతిపై తీవ్ర దిగ్బ్రాంతి ని వ్యక్తం చేస్తూ సంతాపం ప్రకటిస్తున్నారు. మన టాలీవుడ్ నుండి కూడా సోషల్ మీడియా ద్వారా వారి మృతికి సంతాపం తెలియజేసారు. జూనియర్ ఎన్టీఆర్ ఇద్దరు దిగ్గజ నటులు మరణించడంపై ట్విట్టర్ లో స్పందించాడు. అకస్మాత్తుగా దిగ్గజ నటులు ఇద్దరూ చనిపోవడంతో ఎన్టీఆర్ షాక్ కి గురయ్యాడు. అత్యంత ప్రతిభావంతులైన ఇర్ఫాన్ ఖాన్ మరియు పురాణ రిషి కపూర్ లను కోల్పోవడం హృదయ విదారకమని తారక్ పేర్కొన్నాడు. వీరి మరణం భారతీయ సినిమాకు తీరని లోటుగా చెప్పుకొచ్చాడు.

ఇర్ఫాన్ ఖాన్ బుధవారం మధ్యాహ్నం ముంబైలోని కోకిలాబెన్ హాస్పిటల్‌ లో తుదిశ్వాస విడిచారు. న్యూరోఎండోక్రైన్ ట్యూమర్ అనే క్యాన్సర్‌ వ్యాధితో బాధపడుతున్న ఆయన కొన్నాళ్లు లండన్‌లో చికిత్స కూడా తీసుకున్నారు. అంతా బాగానే ఉంది అనుకుంటున్న సమయంలో ఇప్పుడు సడన్ గా ఇర్ఫాన్ చనిపోయాడనే వార్త అందర్నీ కలచివేస్తుంది. ఇర్ఫాన్ ఖాన్ మరణ వార్త మరువక ముందే లెజెండరీ రిషీ కపూర్ కన్నుమూశారు. రిషి కపూర్‌ కూడా క్యాన్సర్‌ తో బాధ పడుతూ ఏడాది పాటు అమెరికాలో చికిత్స తీసుకున్న సంగతి తెలిసిందే. గత కొన్ని రోజులుగా తీవ్ర అస్వస్థతతో ఉన్నారు రిషి కపూర్. ముంబైలోని హెచ్ ఎన్ రిలయెన్స్ ఆసుపత్రి లో చికిత్స పొందుతూ కన్నుమూశారు. ఇద్దరు దిగ్గజ నటులు కూడా క్యాన్సర్ వ్యాధితో బాధ పడుతూనే మరణించారు. వీరి అకాల మరణంతో చిత్ర పరిశ్రమలో విషాద ఛాయలు అలుముకున్నాయి.