సూపర్ స్టార్ కోసం ఎన్టీఆర్ పాడట్లేదట

జూనియర్ ఎన్టీఆర్ హీరోగా స్టార్ స్టేటస్ లో ఉండడమే కాదు.. ఈమధ్య సింగర్ గాను మంచి పేరు సంపాదించేసుకున్నాడు. తన సినిమాల్లో తన పాటలను తాను పాడుకోవడమే కాకుండా.. రీసెంట్ గా కన్నడ స్టార్ పునీత్ రాజ్ కుమార్ కు కూడా పాట పాడాడు ఎన్టీఆర్. ఆ పాట అక్కడ సూపర్ హిట్ కావడం విశేషం.

ఇప్పుడు జూనియర్ ను తన సినిమాలో కూడా పాడమని బాలీవుడ్ నుంచి ఓ ఆఫర్ వచ్చినట్లు టాక్ వచ్చింది. తన ఆల్బంలో పాడాలంటూ బాలీవుడ్ సూపర్ స్టార్ హృతిక్ రోషన్ నుంచి ఎన్టీఆర్ కు ఆఫర్ వచ్చిందని వార్తలొస్తున్నాయి. అయితే.. వీటిని ఎన్టీఆర్ సన్నిహితులు ఖండిస్తున్నారు. హృతిక్ నుంచి అలాంటి ప్రపోజల్ ఏదీ లేదని, ఇదంతా రూమరేనని తేల్చేశారు. ఒకవేళ వచ్చినా.. దీనికి ఎన్టీఆర్ ఒప్పుకునే అవకాశాలు కూడా లేవని చెప్పేశారు.

ప్రస్తుతం ఎన్టీఆర్ జనతా గ్యారేజ్ పనులను జెట్ స్పీడ్ తో ఫినిష్ చేస్తున్నాడు. ఆగస్ట్ రిలీజ్ టార్గెట్ పెట్టుకుని.. కొరటాలతో కలిసి శరవేగంగా వర్క్ చేస్తున్నాడు జూనియర్. నెలరోజులకు పైగా కనీసం బ్రేక్ కూడా లేకుండా జనతా గ్యారేజ్ షూటింగ్ జరుగుతోందంటే.. ఏ స్పీడ్ లో పని చేస్తున్నారో అర్ధమవుతుంది. రీసెంట్ గా హీరోయిన్ సమంత కూడా జనతా గ్యారేజ్ యూనిట్ తో జతయింది.