ఎన్టీఆర్ శాసించాడు.. వర్మ పాటిస్తాడు!

శ్రీరెడ్డి ఎపిసోడ్ తో.. 'ఆఫీసర్' ఫ్లాప్ తో రామ్ గోపాల్ వర్మ డౌన్ అయ్యాడు అని అనుకునే జనాలకు జ్వరం తెప్పించేలా వర్మ తన టాలెంట్ ను మళ్ళీ ఫుల్ గా చూపిస్తున్నాడు. 'లక్ష్మీస్ ఎన్టీఆర్' సినిమాను వజ్రాయుధంలా వాడుకుంటూ ప్రేక్షకులలో ఆసక్తి కలిగేలా స్టేట్మెంట్లు ఇస్తున్నాడు. ఇప్పటివరకూ క్రిష్ - నందమూరి బాలకృష్ణ చేపట్టిన ఎన్టీఆర్ బయోపిక్ ను ఒకరకంగా టార్గెట్ చేసిన వర్మ ఈసారి మాత్రం డైరెక్ట్ గా ఎటాక్ మొదలు పెట్టాడు.

లక్ష్మీస్ ఎన్టీఆర్ ట్రైలర్ ఎప్పుడు రిలీజ్ చేస్తాడు.. 'లక్ష్మీస్ ఎన్టీఆర్' సినిమాను ఎప్పుడు విడుదల చేస్తాడో వివరిస్తూ ట్విట్టర్ లో తనదైన స్టైల్లో నాలుగు ట్వీట్లను అలా వదిలాడు. ఆ ట్వీట్ల సారాంశం ఇదే. "#మహానాయకుడు రిలీజ్ డేట్ ప్రకటించిన డేట్ ను బట్టి 'లక్ష్మీస్ ఎన్టీఆర్' ట్రైలర్ ను విడుదల చేస్తాం. ఎందుకంటే టెక్నికల్.. సైకలాజికల్..వీటన్నిటిని మించి ఎమోషనల్ రీజన్స్ ఉన్నాయి. లక్ష్మీస్ ఎన్టీఆర్ ట్రైలర్ ను #మహానాయకుడు రిలీజ్ డేట్ ను అధికారికంగా ప్రకటించిన 24 నిముషాలకు విడుదల చేయమని స్వర్గంనుంచి ఎన్టీఆర్ హెచ్చరించారు. తనయుడి సినిమా #కథానాయకుడు ను ఎన్టీఆర్ దీవించలేదు కాబట్టి అయన తప్పనిసరిగా తన భార్య సినిమా #లక్ష్మీస్ ఎన్టీఆర్ ను దీవిస్తారు. దానికి రుజువు ఏంటంటే #మహానాయకుడు.. #లక్ష్మీస్ ఎన్టీఆర్ పోటీ.. ఎన్టీఆర్ ఆశీర్వదించుగాక."

ఇంతకంటే ఇక డైరెక్ట్ ఎటాక్ వేరే ఏముంటుంది? అసలే 'కథానాయకుడు' పరాజయంతో తలపట్టుకుని కూర్చున్న ఎన్టీఆర్ బయోపిక్ టీమ్ కు ఆర్జీవీ చెమటలు పట్టించేలా ఉన్నాడు. వాస్తవాలను మసిపూసి మారేడుకాయ చేస్తూ తమకు కావలసిన వాటిని మాత్రం హైలైట్ చేస్తున్నారని ఎన్టీఆర్ బయోపిక్ టీమ్ పై ఇప్పటికే జనాలలో ఒక నెగెటివ్ అభిప్రాయం ఉంది. ఈ పరిస్థితిని తనకు అనుకూలంగా మలుచుకుంటూ అగ్నిలో ఆజ్యం పోసినట్టుగా వర్మ చెలరేగిపోతున్నాడు. ఈ దాడి వల్ల 'లక్షీస్ ఎన్టీఆర్' సూపర్ హిట్ అవుతుందో లేదు తెలీదు గానీ 'మహానాయకుడు' మీద మరింతగా నెగెటివిటీ స్ప్రెడ్ అవ్వడం మాత్రం ఖాయమనిపిస్తోంది.