నివేదా.. ఎన్టీఆర్ మనసు దోచిందా?

తెలుగు సినిమాల్లో ఈ మధ్య అనూహ్యమైన మార్పులొస్తున్నాయి. స్టార్ హీరోలందరూ కూడా కొత్త తరహా కథల వైపు చూస్తున్నారు. వైవిధ్యమైన పాత్రలు ఎంచుకుంటున్నారు. అలాగే హీరోయిన్ల పాత్రలకు సినిమాల్లో ప్రాధాన్యం ఇస్తున్నారు. ఈ ఏడాది నాన్నకు ప్రేమతో.. సోగ్గాడే చిన్నినాయనా.. ఎక్స్ ప్రెస్ రాజా.. ఊపిరి.. అఆ లాంటి సినిమాల్లో హీరోయిన్లకు మంచి ప్రాధాన్యమే దక్కింది. టాలీవుడ్ లేటెస్ట్ హిట్ ‘జెంటిల్ మన్’లో హీరోయిన్లిద్దరికీ మంచి ప్రాధాన్యం ఉంది. ముఖ్యంగా నివేదా థామస్ పోషించిన కేథరిన్ పాత్ర సినిమాకు హైలైట్ గా నిలిచింది. ఆమె నటన కూడా అందరినీ మెప్పించింది. తెలుగులో హీరోయిన్ పాత్రకు ఇంత ప్రాధాన్యం ఉండటం.. ఆ పాత్రలో హీరోయిన్ అంత బాగా రాణించడం అరుదైన విషయం.

‘జెంటిల్ మన్’ సినిమాతో ఒక్కసారిగా ఇండస్ట్రీ దృష్టిని ఆకర్షించిన నివేదాకు మంచి మంచి ఆఫర్లే వస్తున్నట్లు సమాచారం. స్వయంగా జూనియర్ ఎన్టీఆర్ లాంటి స్టార్ హీరో నివేదా విషయంలో ఆసక్తి చూపిస్తున్నాడట. వక్కంతం వంశీ దర్శకత్వంలో తెరకెక్కబోయే తన తర్వాతి సినిమాలో ఓ హీరోయిన్ పాత్రకు నివేదాను తీసుకుందామని రెఫర్ చేశాడట తారక్. ‘జెంటిల్ మన్’ సినిమాలో నివేదా పెర్ఫామెన్స్ చూసి ఫ్లాటైపోయాడు జూనియర్. నివేదా స్వతహాగా మలయాళ అమ్మాయి కాబట్టి.. ఆమెను హీరోయిన్ గా పెట్టుకుంటే మలయాళంలోనూ తన సినిమాకు కలిసొస్తుందని ఎన్టీఆర్ ఆలోచిస్తున్నాడట. ‘జనతా గ్యారేజ్’లో మోహన్ లాల్.. నిత్యామీనన్ లాంటి మల్లూవుడ్ ప్రముఖులు నటిస్తున్న నేపథ్యంలో ఈ సినిమా బాగా ఆడితే ఎన్టీఆర్ కు కేరళలో మంచి ఫాలోయింగ్ వచ్చే అవకాశముంది. అలాగే తన తర్వాతి సినిమాకు కూడా మల్లూవుడ్ జనాల్ని ఆకర్షించే ప్లాన్లో ఉన్నాడన్నమాట ఎన్టీఆర్.