ఎన్టీఆర్ పాట‌లు ఆవిష్క‌రిస్తే ప‌టాసే

చెయ్యి చెయ్యి క‌లిపి ఒక్క‌ట‌వుదాం.. విరామ‌మే లేకుండా శ్ర‌మిద్దాం..! అన్న‌ట్టే ఉంది ఈ అన్న‌ద‌మ్ముల వ్య‌వ‌హారం. ఒక‌రికోసం ఒక‌రు ఏం కావాల‌న్నా ముందుకొస్తున్నారు. అన్న‌ను త‌మ్ముడు, తమ్ముడిని అన్న ఆదుకుంటూ ఆద‌ర్శం అనిపించుకుంటున్నారు. నంద‌మూరి బ్ర‌ద‌ర్స్ ఎన్టీఆర్‌ - క‌ళ్యాణ్ రామ్ గురించే ఇదంతా.

అప్ప‌ట్లో క‌ళ్యాణ్‌ రామ్ న‌టించిన ప‌టాస్ ఆడియో వేడుక‌లో ఎన్టీఆర్ క‌నిపించి, నేరుగా వేదిక‌పై త‌న అన్న గురించి ఎంతో ఎమోష‌న‌ల్ స్పీచ్ ఇచ్చాడు. ఇది నంద‌మూరి నామ సంవ‌త్స‌రం .. ప‌టాస్‌ తోనే మొద‌ల‌వుతుంద‌ని అన్నాడు. ఎన్టీఆర్ కోరుకున్న‌ట్టే ప‌టాస్ పెద్ద విజ‌యం సాధించింది. ఆ త‌ర్వాత క‌ళ్యాణ్‌ రామ్ కిక్ 2 రిలీజ్ క‌ష్టాల్లో ఉన్న‌ప్పుడు ఎన్టీఆర్ బోలెడంత సాయం చేశాడు. నైజాం పంపిణీ విష‌యంలో, కిక్ 2 రిలీజ్ విష‌యంలో కోట్ల లో అన్న‌కు ఆర్థిక‌ సాయం చేశాడు. అంతేకాదు .. ఇప్పుడు క‌ళ్యాణ్‌ రామ్ న‌టించిన షేర్ పాట‌ల్ని ఆవిష్క‌రించేందుకు వ‌స్తున్నాడు. దీనిని బ‌ట్టి ఎన్టీఆర్ ఆడియో వేడుక‌కు విచ్చేస్తే పాట‌లు స‌క్సెస్‌, సినిమా స‌క్సెస్ వ‌స్తుంద‌నే సెంటిమెంట్ క‌ళ్యాణ్‌ రామ్‌ కి ఉంద‌ని అనుకోవాల్సి వ‌స్తోంది.

ఈ నెల 10 న షేర్ పాట‌లు, 30న సినిమా రిలీజ్ చేస్తున్నామ‌ని చెబుతున్నారు. ముందే ప్ర‌క‌టించిన‌ట్టే ఇది నంద‌మూరి నామ సంవ‌త్స‌రం అవ్వాలంటే ఇప్పుడు షేర్ కూడా హిట్ట‌వ్వాల్సిందే. ఏమాత్రం అటూ ఇటూ అయినా డిక్లేరేష‌న్ క‌ష్టం అవుతుంది. ప‌టాస్‌ లానే షేర్ కూడా కామెడీ యాక్ష‌న్ ఎంట‌ర్‌ టైన‌ర్‌. క‌ళ్యాణ్‌ రామ్ కొత్త‌గా క‌నిపిస్తాడ‌ని చెబుతున్నారు. మ‌ల్లిఖార్జున్ ద‌ర్శ‌క‌త్వంలో కొమ‌ర వెంక‌టేష్ ఈ చిత్రాన్ని నిర్మిస్తున్నారు.