MAA ఎన్నిక‌ల్లో ఓటేసే ప్ర‌స‌క్తే లేద‌న్న ఎన్టీఆర్

మూవీ ఆర్టిస్టుల సంఘం (మా) ఎన్నిక‌లు ఈనెల 10న జ‌ర‌గ‌నున్న సంగ‌తి తెలిసిందే. ఈ ఎన్నిక‌ల్లో ప్ర‌కాష్ రాజ్ వర్సెస్ మంచు విష్ణు వార్ ప‌రాకాష్ట‌కు చేరుకుంది. ఎవ‌రికి వారు వ‌ర్గ‌పోరును న‌డిపిస్తూ వేడి పెంచేస్తున్న సంగ‌తి తెలిసిందే. మ‌రో ఐదురోజుల్లోనే ఎన్నిక‌లు కాబ‌ట్టి వేడి అంత‌కంత‌కు పెరుగుతోందే కానీ త‌గ్గ‌డం లేదు.

అయితే ప్ర‌తిసారీ స్టార్ హీరోలు ఓట్లు వేసేందుకు రావ‌డం లేద‌న్న విమ‌ర్శ‌లు ఉండ‌గా.. ఈసారి పోస్ట‌ల్ బ్యాలెట్ విధానంలో ఓట్లు కోర‌డం ఆస‌క్తిగా మారింది. ఒక‌వేళ స్టార్లు ఆన్ లొకేష‌న్ ఉన్నా కానీ తమ ఓటు హ‌క్కును స‌ద్వినియోగం చేసుకునేందుకు ఈ విధానం అనుకూలిస్తుంది.

తాజాగా యంగ్ టైగ‌ర్ ఎన్టీఆర్ ఓటేస్తారా లేదా? అన్న‌దానిపైనా క్లారిటీ వ‌చ్చేసింది. ప్ర‌స్తుతం `మా`లో జ‌రుగుతున్న ప‌రిణామాలపై తార‌క్ చాలా గుర్రుగా ఉన్నారు. ఇది త‌న‌కు న‌చ్చ‌డం లేద‌ని ఓటేసేందుకు రాలేన‌ని అన్నార‌ట‌. జ‌న‌ర‌ల్ కార్య‌ద‌ర్శిగా పోటీప‌డుతున్న జీవిత రాజ‌శేఖ‌ర్ త‌న కోసం ఓటేయాల్సిందిగా కోర‌గా తార‌క్ పైవిధంగా స‌మాధాన‌మిచ్చారు. ఇక‌పై త‌న‌ను ఓటేయాల‌ని కోరొద్ద‌ని కూడా యంగ్ టైగ‌ర్ అన్నారట‌. ఎన్టీఆర్ ప్ర‌స్తుతం ఎవ‌రు మీలో కోటీశ్వ‌రుడు? షోతో బిజీగా ఉన్నారు. మ‌రోవైపు ఆర్.ఆర్.ఆర్ రిలీజ్ కోసం వేచి చూస్తున్నారు. ఇంకోవైపు కొర‌టాల‌తో సినిమా షూటింగ్ ఫార్మాలిటీస్ లోనూ ఉన్నారు.