బాలీవుడ్ స్టార్ డైరెక్టర్ తో ఎన్టీఆర్..?

యంగ్ టైగర్ ఎన్టీఆర్ వరుస ప్రాజెక్ట్స్ తో పాన్ ఇండియా మార్కెట్ ని టార్గెట్ చేస్తున్నారు. దర్శకధీరుడు రాజమౌళి దర్శకత్వంలో రామ్ చరణ్ తో కలిసి చేసిన ప్రతిష్టాత్మక చిత్రం 'ఆర్.ఆర్.ఆర్' రిలీజ్ కు రెడీగా ఉంది. ఫిక్షనల్ పీరియాడికల్ యాక్షన్ డ్రామాగా రూపొందిన ఈ చిత్రాన్ని వచ్చే ఏడాది జనవరి 7న ప్రేక్షకుల ముందుకు తీసుకురానున్నారు. దీని తర్వాత తారక్ చేయబోయే రెండు సినిమాల మీద ఇప్పటికే క్లారిటీ వచ్చేసింది.

టాలీవుడ్ స్టార్ డైరెక్టర్ కొరటాల శివ - కన్నడ దర్శకుడు ప్రశాంత్ నీల్ లతో ఎన్టీఆర్ సినిమాలు చేయనున్నట్లు ఇప్పటికే ప్రకటించారు. ఇందులో #NTR30 మూవీ వచ్చే నెలలో ప్రారంభమయ్యే అవకాశాలు ఉన్నాయి. అయితే ఈ క్రమంలో బాలీవుడ్ పాపులర్ డైరెక్టర్ సంజయ్ లీలా భన్సాలీ.. నందమూరి తారక రామారావుతో ఓ హిందీ సినిమా చేయ‌డానికి ఉత్సాహం చూపిస్తున్న‌ట్లుగా సోషల్ మీడియాలో తెగ వార్త‌లొస్తున్నాయి.

'దేవదాస్' 'బాజీరావ్ మస్తానీ' 'రామ్ లీలా' 'పద్మావత్' వంటి అద్భుతమైన పీరియాడికల్ సినిమాలను వెండి తెరపై ఆవిష్కరించిన దర్శకుడు సంజయ్ లీలా భన్సాలీ. ప్రస్తుతం అలియా భట్ తో 'గంగూబాయి కతియవాడి' అనే చిత్రాన్ని విడుదలకు సిద్ధం చేశారు. అయితే భారీ సినిమాలు తెరకెక్కించే భన్సాలీ.. ఇప్పుడు తారక్ తో ఓ మూవీ ప్లాన్ చేస్తున్నారట. ఇప్పటికే జూనియర్ ఎన్టీఆర్ తో బ‌న్సాలీ మాట్లాడారని.. వీళ్లిద్ద‌రి మ‌ధ్య చారిత్ర‌క నేప‌థ్యం ఉన్న సినిమా వ‌చ్చే అవ‌కాశ‌ముంద‌ని ట్విట్టర్ లో పెద్ద ఎత్తున డిస్కషన్ జరుగుతోంది. భారీ బడ్జెట్ తో రూపొందే ఈ పీరియాడిక్ డ్రామా కోసం ప్రముఖ విఎఫ్ఎక్స్ సంస్థ స్కెచ్‌ లను కూడా సిద్ధం చేస్తోందని అంటున్నారు.

ఇందులో నిజమెంతో తెలియదు కానీ.. ఎన్టీఆర్ - సంజయ్ లీలా బన్సాలీ క‌ల‌యిక‌లో సినిమా వ‌స్తే మాత్రం అదొక సంచలనం అవుతుంద‌న‌డంలో సందేహం లేదు. 'ఆర్.ఆర్.ఆర్' సినిమాతో తారక్ కు ఎలాగూ పాన్ ఇండియా క్రేజ్ వస్తుంది కాబట్టి.. బాలీవుడ్ దర్శకుడితో సినిమాలు చేసే అవకాశాలు ఉన్నాయి. సంజయ్ తో ఎన్టీఆర్ చేసే మూవీ ఛత్రపతి శివాజీ బయోపిక్ అయితే బాగుంటుందని ఫ్యాన్ మేడ్ పోస్టర్స్ తో అభిమానులు సందడి చేస్తున్నారు. మరి నందమూరి వారసుడు ఎలాంటి సినిమాతో డైరెక్ట్ బాలీవుడ్ ఎంట్రీ ఇస్తాడో చూడాలి.

ఇదిలా ఉండగా ఎన్టీఆర్ నటిస్తున్న 'ఆర్ ఆర్ ఆర్'.. సంజయ్ లీలా భన్సాలీ రూపొందించిన 'గంగూబాయి కతియవాడి' సినిమాలు బాక్సాఫీస్ వద్ద పోటీ పడనున్నాయి. RRR జనవరి 7న వస్తుంటే.. 'గంగూబాయి' ఒక్కరోజు ముందుగా జనవరి 6న థియేటర్లలోకి వస్తోంది. రెండూ వేర్వేరు జోనర్లలో వస్తున్న బహుభాషా చిత్రాలు. రెండింటిలోనూ అలియా భట్ ప్రధాన పాత్ర పోషిస్తోంది. రెండు సినిమాలనూ పెన్ స్టూడియోస్ వారే రిలీజ్ చేస్తుండటం గమనార్హం. విడుదలకు ఇంకా సమయం ఉంది కాబట్టి ఈ గ్యాప్ లో తేదీలను మార్చుకునే ఆలోచన చేస్తారేమో చూడాలి.

* 'ఎవరు మీలో కోటీశ్వరులు' షూటింగ్ పూర్తి..

ఇకపోతే ఎన్టీఆర్ హోస్ట్ చేస్తున్న 'ఎవరు మీలో కోటీశ్వరులు' గేమ్ షో చివరి దశకు వచ్చేసింది. ఇప్పటికే ఫైనల్ ఎపిసోడ్ కు సంబంధించిన షూటింగ్ పూర్తి అయిందని తెలుస్తోంది. మెగా పవర్ స్టార్ రామ్ చరణ్ సెలబ్రిటీ గెస్టుగా వచ్చిన ఎపిసోడ్ తో ఈ షో ప్రారభమైన సంగతి తెలిసిందే. సూపర్ స్టార్ మహేష్ బాబు పాల్గొన్న ఎపిసోడ్ తో ఈ గేమ్ షో ముగియనుందని సమాచారం. త్వరలోనే మహేష్ - తారక్ కలసి అలరించనున్న ప్రోగ్రామ్ ప్రోమో బయటకు రానుంది. మరి 'EMK' సీజన్-2 కు కూడా ఎన్టీఆర్ హోస్ట్ గా ఉంటారో లేదో చూడాలి.