టైగ‌ర్ తో క్రితిస‌స‌న్ సోద‌రి ఎంట్రీ

వ‌రుస సినిమాల‌తో మాస్ మ‌హారాజా ర‌వితేజ సంద‌డి చేయ‌డానికి రెడీ అవుతున్నాడు. ఇటీవ‌లే `ఖిలాడీ` చిత్రంతో ప్రేక్ష‌కుల ముందుకొచ్చిన మాస్‌రాజా ప్ర‌స్తుతం బ్యాక్ టు బ్యాక్ నాలుగు చిత్రాల్లో న‌టిస్తూ బిజీగా వున్నారు. అందులో `రామారావు ఆన్ డ్యూటీ` షూటింగ్ పూర్తి చేసుకుని పోస్ట్ ప్రొడ‌క్ష‌న్ కార్య‌క్ర‌మాలు జ‌రుపుకుంటోంది. త్రినాథ‌రావు న‌క్కిన తెర‌కెక్కిస్తున్న‌ `ధ‌మాకా` మూవీ చిత్రీక‌ర‌ణ చివ‌రి ద‌శ‌కు చేరుకుంది. ఇక సుధీర్ వ‌ర్మ డైరెక్ష‌న్ లో ఐదుగురు హీరోయిన్ ల‌తో ర‌వితేజ చేస్తున్న `రావ‌ణాసుర‌` నాన్ స్టాప్ గా షూటింగ్ జ‌రుపుకుంటోంది.

ఓ ప‌క్క వ‌రుస చిత్రాల్లో హీరోగా న‌టిస్తూనే మ‌రో ప‌క్క చిరుతో క‌లిసి ప్ర‌త్యేక అతిథి పాత్ర‌లో క‌నిపించ‌డానికి రెడీ అయిపోయారు ర‌వితేజ‌. బాబీ డైరెక్ట్ చేస్తున్న ఈ మూవీ షూటింగ్ ప్ర‌స్తుతం జ‌రుగుతోంది. త్వ‌ర‌లోనే ఈ మూవీ సెట్ లో ర‌వితేజ సంద‌డి చేయ‌బోతున్నాడు. ఇలా వ‌రుస చిత్రాల్లో న‌టిస్తూ బిజీ బిజీగా గ‌డిపేస్తున్న మాస్ మ‌హారాజా స్టూవ‌ర్ట్ పురం గ‌జ‌దొంగ టైగ‌ర్ నాగేశ్వ‌ర‌రావు జీవిత క‌థ ఆధారంగా తెర‌కెక్కుతున్న `టైగ‌ర్ నాగేశ్వ‌ర‌రావు` చిత్రంలో న‌టిస్తున్నారు.

ఉగాది నుంచి ఈ మూవీ రెగ్యుల‌ర్ షూటింగ్ ప్రారంభం కాబోతోంది. ఇదే రోజు ర‌వితేజ‌ ప్రీ లుక్ ని విడుద‌ల చేయ‌బోతున్నారు. వంశీ ద‌ర్శ‌క‌త్వంలో అబిషేక్ అగ‌ర్వాల్ ఆర్ట్స్‌ బ్యాన‌ర్ పై అభిషేక్ అగ‌ర్వాల్ నిర్మిస్తున్నారు. ఇందులో హీరోయిన్ గా ఎవ‌రు న‌టిస్తున్నార‌న్న‌ది ఇప్ప‌టి వ‌ర‌కు మేక‌ర్స్ స‌స్పెన్స్ గానే వుంచారు. గురువారం ఆ విష‌యాన్ని రివీల్ చేశారు. ఈ మూవీలో నుపూర్ స‌న‌న్ హీరోయిన్ గా న‌టించ‌నుంది.

నుపూర్ స‌న‌న్ ఇతంకు ముందే తెలుగులో ప‌రిచ‌య‌మైన క్రితిస‌న‌న్ సోద‌రి. అక్ష‌య్ కుమార్ తో క‌లిసి`ఫిల్హాల్ 2 : మ‌ఒహ‌బ్బ‌త్‌` అనే మ్యూజిక్ వీడియోలో న‌టించింది. ప్ర‌స్తుతం న‌వాజుద్దీన్ సిద్ధిఖీ న‌టిస్తున్న చిత్రంతో బాలీవుడ్ కు ప‌రిచ‌యం అవుతోంది. తెలుగులో `టైగ‌ర్ నాగేశ్వ‌ర‌రావు` చిత్రంతో నుపూర్ స‌న‌న్ ఎంట్రీ ఇస్తున్న విష‌యాన్ని చిత్ర బృందం గురువారం సోష‌ల్ మీడియా వేదిక‌గా వెల్ల‌డించింది. జీవీ ప్ర‌కాష్ కుమార్ సంగీతం అందిస్తున్న ఈ చిత్రాన్ని ఉగాది రోజైన ఏప్రిల్ 2న ఉద‌యం మాధాపూర్ లోని హెచ్ ఐ సీసీ నోవాటెల్ లో లాంఛ‌నంగా ప్రారంభించ‌బోతున్నారు. తెలుగుతో పాటు ఐదు భాష‌ల్లో పాన్ ఇండియా మూవీగా ఈ చిత్రం విడుద‌ల కానుంది.