బ‌న్నీని పెళ్లాడేస్తానంది.. కుదిరేప‌నేనా?

టాలీవుడ్ స్టైలిష్ స్టార్ అల్లు అర్జున్‌ కి మాలీవుడ్ లో ఉన్న ఫ్యాన్ ఫాలోయింగ్ గురించి తెలిసిందే. కోట్లాది మంది వీరాభిమానులు ఉన్నారు. ఆర్య‌, ఆర్య‌2 మొద‌లు అత‌డు న‌టించిన ప్ర‌తి సినిమా మ‌ల్లూవుడ్ లో బంప‌ర్ హిట్లు కొట్టాయి. తెలుగులో బ‌న్ని సినిమాలు ఫ్లాపైనా మాలీవుడ్ లో బ్లాక్ బ‌స్ట‌ర్లు సాధించాయి. అక్క‌డ యువ‌త‌రంలో అంత ఫాలోయింగ్ ఉంది కాబ‌ట్టే ఇదంతా సాధ్య‌మైంది. అయితే బ‌న్ని అంటే చెవి కోసుకునే ఫ్యాన్స్ జాబితాలో `ల‌వ‌ర్స్ డే` (ఒరు ఆధార్ ల‌వ్‌) బ్యూటీస్ ఉన్న సంగ‌తి తెలిసిందే. ఇదివ‌ర‌కూ ల‌వ‌ర్స్ డే ప్రీరిలీజ్ ఈవెంట్ లో వింక్ గాళ్ ప్రియా ప్ర‌కాష్ వారియ‌ర్ త‌న అభిమానం చాటుకుంది. బ‌న్నితో క‌లిసి సెల్ఫీ దిగింది ఈ బ్యూటీ. ఈ అమ్మ‌డితో పాటు ల‌వ‌ర్స్ డే న‌టీన‌టులంతా బ‌న్నీపై అభిమానం చాటుకోవ‌డ‌మే గాకుండా ఫోటోలు దిగారు.

అదంతా స‌రే.. బ‌న్నీకి వింక్ గాళ్ ప్రియా ప్రకాష్ మాత్ర‌మే కాదు.. ఆ చిత్రంలో మ‌రో కీల‌క పాత్ర‌లో న‌టించిన‌ రింగుల జుత్తు సుంద‌రి నూరీన్ ష‌రీఫ్ అంతే వీరాభిమాని. ల‌వ‌ర్స్ డే ఈవెంట్‌ లో బ‌న్ని త‌న చేతిలో చెయ్యి వేసి మ‌రీ మాట్లాడారు. అప్పుడు త‌న‌తో ఫోటో దిగాను. అంత పెద్ద స్టార్ .. నా అభిమాన హీరోతో అలా ఫోటో దిగే ఛాన్స్ వ‌చ్చినందుకు ఉబ్బిత‌బ్బిబ్బ‌య్యాను. బ‌న్నీని పెళ్లి చేసుకోవాల‌న్నంత ఆనందం క‌లిగింది.. అంటూ నేడు హైద‌రాబాద్ ఫిలింఛాంబ‌ర్ లో జ‌రిగిన ఇంట‌ర్వ్యూలో నూరీన్ ష‌రీఫ్‌ అంది.

`ల‌వ‌ర్స్ డే` చిత్రంలో ప్ర‌ధాన నాయిక మీరే క‌దా? ఆ త‌ర్వాత వింక్ సెన్సేష‌న్ ప్రియా ప్ర‌కాష్ ని మెయిన్ లీడ్ గా మార్చారు. మీకు బాధ క‌ల‌గ‌లేదా? అంటే.. నేను కూడా అంద‌రిలానే ఫీల‌య్యాను. చిన్న పాటి బాధ క‌లిగిన మాట నిజ‌మే. అయితే అదంతా సినిమా కోసం త‌ప్ప‌ద‌ని అనుకున్నాను అని తెలిపింది. అంద‌రం క‌లిసి జాలీగా షూటింగ్ చేశామ‌ని వెల్ల‌డించింది. ప్ర‌స్తుతం ప్రియా ప్ర‌కాష్ తో స్నేహంగానే ఉన్నారా? అని ప్ర‌శ్నిస్తే.. మేం అంతా చాలా సంతోషంగానే ఉన్నామ‌ని తెలిపింది. ప్ర‌స్తుతం తెలుగులో కొన్ని స్క్రిప్టులు వింటున్నాను. కానీ ఏదీ ఓకే చెప్ప‌లేదు అని తెలిపింది.