వీడియో: 'కొండ పొలం' నుంచి సోల్ ఫుల్ మెలోడీ 'ఓబులమ్మ'

క్రిష్ జాగర్లమూడి దర్శకత్వంలో మెగా మేనల్లుడు పంజా వైష్ణవ్ తేజ్ - స్టార్ హీరోయిన్ రకుల్ ప్రీత్ సింగ్ జంటగా నటించిన చిత్రం ''కొండ పొలం''. ఫారెస్ట్ బ్యాక్ డ్రాప్ లో గ్రామీణ అడ్వెంచర్ మూవీగా తెరకెక్కుతున్న ఈ చిత్రాన్ని అక్టోబర్ 8న ప్రేక్షకుల ముందుకు తీసుకురానున్నారు. ఇందులో కటారు రవీంద్ర యాదవ్ గా వైష్ణవ్ - ఓబులమ్మగా రకుల్ నటిస్తున్నారు. ఇటీవల విడుదలైన ఫస్ట్ లుక్ మోషన్ పోస్టర్ సినిమాపై ఆసక్తిని కలిగించింది. ఈ క్రమంలో తాజాగా చిత్రంలోని 'ఓబులమ్మ' అనే పాట ఫుల్ వీడియోని మేకర్స్ రిలీజ్ చేశారు.

'గింజ గింజ గింజ మీద.. బుసక బుసక బుసక తీసి తియ్యంగ బత్తెమై పోయే.. బొట్టే కట్టి చేతబట్టిన చేతిలోకి చేరాలని.. గుండెజల్ల ఆరట పడిపోయే.. ఓ ఓబులమ్మా..' అంటూ సాగిన ఈ పాట వీక్షకులను అలరిస్తోంది. ఈ గీతానికి ఎంఎం కీరవాణి బాణీలు సమకూర్చడమే కాకుండా.. సాహిత్యం అందించడం విశేషం. కీరవాణి బ్యూటిఫుల్ కంపోజిషన్ లో వచ్చిన ఈ పాటలో ఫ్లూట్ బిట్స్ అదనపు ఆకర్షణగా నిలిచింది. ఈ పాటకు రాయలసీమ యాసలో పెద్దగా ఉపయోగం లేని అందమైన సాహిత్యాన్ని అందించారు కీరవాణి.

'మమతల తల్లి' సాంగ్ పాడిన సత్య యామిని.. పివిఎన్ఎస్ రోహిత్ తో కలిసి ఈ సోల్ ఫుల్ మెలోడీ సాంగ్ ను అద్భుతంగా ఆలపించారు. ''ఓబులమ్మ'' పాటలో పల్లెటూరి నేపథ్యానికి తగ్గట్టుగా వైష్ణవ్ తేజ్ - రకుల్ ప్రీత్ సింగ్ లుక్స్ ఆకట్టుకుంటున్నాయి. ఇద్దరి మధ్య కెమిస్ట్రీ కూడా బాగా కుదిరింది. సినిమాటోగ్రాఫర్ జ్ఞాన శేఖర్ వీఎస్ అందమైన అటవీ ప్రదేశాలు.. గ్రామీణ నేపథ్యాన్ని చక్కగా చూపించారు. ఈ పాటకు భాను కొరియోగ్రఫీ చేశారు. ఈ పాట చాలా కాలం పాటు శ్రోతల మనస్సులో నిలిచి పోతుందని చెప్పవచ్చు.

''కొండపొలం'' సినిమా బిబో శ్రీనివాస్ సమర్పణలో ఫస్ట్ ఫ్రేమ్ ఎంటర్‌టైన్‌మెంట్స్ బ్యానర్‌ పై ప్రొడక్షన్ నెం. 8 గా రూపొందుతోంది. సాయిబాబు జాగర్లమూడి - రాజీవ్ రెడ్డి నిర్మాతలుగా వ్యవహరిస్తున్నారు. ఈ చిత్రానికి శ్రవణ్ కటికనేని ఎడిటర్ గా.. రాజ్ కుమార్ గిబ్సన్ ఆర్ట్ డైరెక్టర్ గా వర్క్ చేస్తున్నారు. సన్నపురెడ్డి వెంకట రామిరెడ్డి రాసిన 'కొండపొలం' నవల ఆధారంగా ఈ సినిమా రూపొందుతోంది.