'ఒకే ఒక జీవితం'.. యువ హీరో ఆశించిన విజయాన్ని అందించేనా..?

యంగ్ హీరో శర్వానంద్ గత కొంతకాలంగా సాలిడ్ హిట్ కోసం తీవ్రంగా కష్టపడుతున్నారు. అయినప్పటికీ నాలుగేళ్ళ క్రితం వచ్చిన ‘మహానుభావుడు’ సినిమా స్థాయి విజయాన్ని అందుకోలేకపోతున్నారు. ‘పడి పడి లేచే మనసు’ ‘రణరంగం’ ‘జాను’ వంటి హ్యాట్రిక్ ప్లాప్స్ అందుకున్న శర్వా.. ఈ ఏడాది ‘శ్రీకారం’ ‘మహాసముద్రం’ చిత్రాలతో నిరాశ పరిచారు. ఈ నేపథ్యంలో శర్వా ఆశలన్నీ రాబోయే 'ఆడవాళ్లు మీకు జోహార్లు' 'ఒకే ఒక జీవితం' సినిమాల మీదనే ఉన్నాయి.

శర్వానంద్ హీరోగా నటిస్తున్న 30వ చిత్రం ''ఒకే ఒక జీవితం''. తెలుగు తమిళ భాషల్లో తెరకెక్కుతున్న ఈ బైలింగ్విల్ మూవీతో శ్రీ కార్తిక్ డైరెక్టర్ గా పరిచయం అవుతున్నారు. అప్పుడెప్పుడో షూటింగ్ పూర్తి చేసుకున్న ఈ సినిమా కరోనా కారణంగా ఆలస్యం అయింది. అయితే ప్రస్తుతం పోస్ట్ ప్రొడక్షన్ జరుపుకుంటున్న ఈ చిత్రాన్ని.. 2022 ఫిబ్రవరిలో విడుదల చేయనున్నట్లు మేకర్స్ ఇటీవలే అధికారికంగా ప్రకటించారు. ఈ నేపథ్యంలో ప్రమోషన్స్ మొదలు పెడుతున్నారు.

ఇందులో భాగంగా తాజాగా 'ఒకే ఒక జీవితం' సినిమాకు సంబంధించిన టీజర్ అప్డేట్ ఇచ్చారు. డిసెంబర్ 28వ తేదీ సాయంత్రం 5 గంటలకు టీజర్ ను రిలీజ్ చేయనున్నట్లు చిత్ర బృందం తెలిపింది. ఈ సందర్భంగా ఓ పోస్టర్ ని వదిలారు. ఇందులో శర్వానంద్ తో పాటుగా హాస్యనటులు వెన్నెల కిషోర్ - ప్రియదర్శి కనిపిస్తున్నారు. ఈ సినిమాలో శర్వా సరసన రీతూ వర్మ హీరోయిన్ గా నటించింది. అక్కినేని అమల కీలక పాత్ర పోషించింది.

సైన్స్ ఫిక్షన్ ఎలిమెంట్స్ తో ఫ్యామిలీ డ్రామాగా తెరకెక్కుతున్న ఈ చిత్రంలో.. ఫ్యామిలీ ఆడియన్స్ తో పాటు యూత్ ని ఆకట్టుకునే అంశాలు ఉంటాయని చిత్ర బృందం చెబుతోంది. ఇప్పటికే విడుదలైన ''ఒకే ఒక జీవితం'' ఫస్ట్ లుక్ పోస్టర్ మరియు శర్వానంద్ పాత్రకి సంభందించిన స్నీక్ పీక్ మంచి రెస్పాన్స్ తెచ్చుకున్నాయి. ఈ క్రమంలో మరో రెండు రోజుల్లో రాబోతున్న టీజర్ ఎలా ఉంటుందో చూడాలి.

డ్రీమ్ వారియర్ పిక్చర్స్ బ్యానర్ పై ఎస్ ఆర్ ప్రకాశ్ బాబు - ఎస్.ఆర్ ప్రభు ఈ చిత్రాన్ని నిర్మిస్తున్నారు. 'పెళ్లి చూపులు' దర్శకుడు తరుణ్ భాస్కర్ ఈ సినిమాలో డైలాగ్స్ రాయగా.. జేక్స్ బీజోయ్ సంగీతం సమకూరుస్తున్నారు. 'డియర్ కామ్రేడ్' చిత్రానికి వర్క్ చేసిన సినిమాటోగ్రాఫర్ సుజీత్ సారంగ్ - ఎడిటర్ శ్రీ జిత్ సారంగ్ ఈ సినిమాకి పని చేశారు. సరైన సక్సెస్ కోసం వేచి చూస్తున్న శర్వానంద్ కు 'ఒకే ఒక జీవితం' ఎలాంటి హిట్ అందిస్తుందో చూడాలి.