దెయ్యాల సినిమాలే తీయమంటున్నారు

టాలీవుడ్ లో ఒక ట్రెండ్ ఏదన్నా సెట్ అయిందంటే.. అదే మూసలో వరుసపెట్టి సినిమాలు వస్తుంటాయి. అలాగే ఓ డైరెక్టర్ ఒక టైపు సినిమాలకు సూట్ అని ఫిక్స్ అయితే.. ఇక వరుసగా అలాంటివే చేస్తూంటారు. కొత్తగా ట్రై చేస్తే జనాలు తిప్పికొట్టడమో, బిజినెస్ జరక్కపోవడమో లాంటి సమస్యలు ఎదురవతుంటాయి.

ఇప్పుడిలాంటి సమస్య టీవీ యాంకర్ నుంచి డైరెక్టర్ గా మారిన ఓంకార్ కి కూడా ఎదురవుతోంది. మొదటి సినిమా జీనియస్ దెబ్బ కొట్టినా.. రెండో మూవీ రాజు గారి గదితో బౌన్స్ బ్యాక్ అయ్యాడు ఓంకార్. బడ్జెట్ తో పోల్చితే బ్లాక్ బస్టర్ అనదగ్గ విజయం సాధించి.. క్రేజీ ఆఫర్స్ తన దగ్గరికి వచ్చే రేంజ్ కి చేరుకున్నాడు. దీంతో తర్వాత తీయబోయే సినిమా ఏ జోనర్ లో ఉండాలనే ఆలోచనలో పడ్డాడు ఓంకార్. నిజానికి ఇతగాడు ఇప్పటికే రాజు గారి గది సీక్వెల్ కి స్క్రిప్ట్ వర్క్ ఫినిష్ చేసుకున్నా.. వెంటనే దెయ్యాల జోనర్ లోనే మూవీ ఎందుకనే ఉద్దేశ్యంతో ఆగుతున్నాడు.

ఓంకార్‌ ని ఫ్యామిలీ సబ్జెక్ట్‌ తీయమని స్నేహితులు చెబుతుంటే.. మూడో సినిమా కూడా సక్సెస్‌ అవ్వాలంటే దెయ్యాలనే నమ్ముకో అంటూ ఇండస్ట్రీ వారు సలహాలు ఇస్తున్నారట. దీంతో రెండు కాన్సెప్టులపై సబ్జెక్టులూ రెడీ చేసుకున్నాడు. ఏది తీయాలో మాత్రం డిసైడ్ చేసుకోలేకపోతున్నాడు. మరి ఇంతకీ ఓంకార్ ఇప్పుడు ఏ సబ్జెక్ట్ తీయాలన్నది మళ్లీ క్వశ్చన్ గానే మిగిలిపోతోంది. అయితే.. సక్సెస్ వెనకే ఎప్పుడూ క్రేజ్ ఉంటుంది కాబట్టి.. అచ్చొచ్చిన జోనర్ నే నమ్ముకోమన్నది ఎక్కువమంది సలహా. మరి ఓంకార్ అన్నయ్య ఏం చేస్తాడో!